नेकपा एमालेका अध्यक्ष केपी शर्मा ओलीले प्रधानमन्त्रीलाई समर्थन गरेर कांग्रेसले कुनै जाल फालेको भए त्यस जालमा कुनै माछा नपर्ने दाबी गरेका छन् ।

प्रतिनिधिसभाको बैठकमा प्रधानमन्त्री पुष्पकमल दाहाल प्रचण्डलाई विश्वासको मतका सम्बन्धमा भएको छलफलमा ओलीले कांग्रेसको समर्थनप्रति कटाक्ष गरेका हुन् ।

'यदि यो समर्थनभित्र सदाशयताबाहेक अरू कुरा छैन भने, यदि यो समर्थन कुनै जाल हैन भने, यदि यो समर्थन कुनै ढोक्सा हैन भने स्वागतयोग्य छ,' ओलीले भने, '​ढोक्सा हो भने म भन्न चाहन्छु, जाल हो भने म भन्न चाहन्छु, माछा नभएको खोलामा फालेजस्तो हुनेछ जाल । यसभित्र भोलिका निम्ति अरू खालका कुरा सोचिएको छ भने ढोक्सा रित्तै हुनेछ, किनभने त्यस खोलीबाट ढोक्सा थापेतिर कुनै माछा बग्ने छैन ।'

यसअघि सम्बोधन गर्दै कांग्रेस सभापति शेरबहादुर देउवाले प्रतिपक्षमा बसेर सरकारलाई विश्वासको मत दिने बताएका थिए ।

ओलीले राप्रपा पनि समर्थन गरेर सरकारमा नगएको भन्दै कांग्रेसको हैसियत अब त्यही रहेको बताए ।