नरैनापुरमा ईलाका प्रशासन पुनःस्थापना गर्न गृहमन्त्री रवि लामिछानेको निर्देशन

बाँकेको नरैनापुरमा ईलाका प्रशासन कार्यालय पुनःस्थापनाको लागि पहल गरिएको छ ।

नरैनापुरमा यथाशीघ्र ईलाका प्रशासन पुनःस्थापनाको लागि उपप्रधान तथा गृहमन्त्री रवि लामिछानेलाई नरैनापुरवासीको तर्फबाट ध्यानाकर्षण गराएको बाँके क्षेत्र नम्बर १ का प्रतिनिधिसभा सदस्य सूर्य ढकालले जानकारी दिए ।

गृहमन्त्री लामेछानेले गृह सचिव विनोदप्रकाश सिंहलाई ईलाका प्रशासन पुनःस्थापनाको लागि निर्देशन दिएकाले अब छिट्टै नरैनापुर गाउँपालिकामा ईलाका प्रशासन कार्यालय पुनःस्थापना हुने उनले बताए ।

बाँकेका प्रमुख जिल्ला अधिकारी सूर्यबहादुर खत्रीले गृहसचिव सिंहले फोनमार्फत नरैनापुरमा इलाका प्रशासन पुनःस्थापना गर्न आवश्यक पहल गर्न र स्थानीय सरकारसँग समन्वय गर्न निर्देशन दिएको बताए ।

बाँकेको सदरमुकाम नेपालगञ्जदेखि ४४ किलोमिटर टाढा राप्ती नदीपारी अवस्थित नरैनापुर क्षेत्रमा ईलाका प्रशासन कार्यालय नहुँदा स्थानीयवासीले सास्ती झेल्नुपरेको छ । नरैनापुर गाउँपालिका–४ मा रहेको इलाका प्रशासन कार्यालय २०७२ सालमा असुरक्षाको कारण देखाइ नेपालगञ्जमा विस्थापित भएको थियो । त्यसयता स्थानीय सरकारको रूपमा गाउँपालिका कार्यालय स्थापना भइसके पनि ईलाका प्रशासन कार्यालय भने हालसम्म पुनःस्थापित हुन सकेको छैन । 

ईलाका प्रशासन कार्यालय नहुँदा सहजै प्राप्त हुने नागरिकता प्रमाणपत्र बनाउने लगायतका सेवाबाट नरैनापुरवासी वञ्चित भएको स्थानीय अगुवा सोहनलाल यादवले बताए । उनले अहिले नागरिकता बनाउन सदरमुकाम नेपालगञ्ज आउनुपर्दा जनतालाई समय र आर्थिक भार पर्ने गरेको उल्लेख गरेका छन् ।