लोकप्रिय 'हाम्रो पात्रो' एपको टेलिहेल्थ सेवा, ‘हाम्रो पात्रो हेल्थ’ले स्थापनाको १ वर्षभित्र ३००० भन्दा बढी व्यक्तिहरू र २४ विशेषज्ञताका २०० भन्दा बढी डाक्टरहरूलाई इन्टरनेट पहुँच पुगेका नेपाली गाउँ, सहर तथा प्रवासबाट जोड्न सफल भइसकेको छ। 

यस सेवामार्फत डाक्टर खोज्न, डाक्टरसँग एपोइन्टमेन्ट लिन, डाक्टरसँग परामर्श लिन, प्रेस्क्रिप्सन लिन, डाक्टरसँग फलोअप गर्न र डाक्टरलाई रिभ्यु गर्न मिल्नेछ।

यस हाम्रो पात्रो हेल्थ सेवाले आफ्नो प्लेटफर्मलाई नगरपालिकाहरूको लागि खुला गरेको छ।

नगरपालिकाहरूले हाम्रो पात्रो हेल्थमार्फत आफ्ना नगरपालिका भित्रका वृद्धवृद्धा, फरक शारीरिक क्षमता भएका व्यक्तिहरू, स्कुले बालबालिका, महिलाहरूलाई नगरपालिका भित्रका डाक्टरसँग घरबाट नै निःशुल्क परामर्श लिन सक्ने व्यवस्था गर्न सक्नेछन्।

चाँगुनारायाण नगरपालिकाले हाम्रो पात्रो हेल्थमार्फत नगरपालिका भित्रका वृद्धवृद्धा, फरक शारीरिक क्षमता भएका व्यक्तिहरू, स्कुले बालबालिका, महिलाहरूलाई नगरपालिका भित्रका डाक्टरसँग घरबाट  निःशुल्क परामर्श सेवा शुरू गरेको छ।

आज एक समारोहबीच चाँगुनारायण नगरपालिका प्रमुख जीवन खत्रीले नगरका डाक्टर श्री शैलेश त्वानावासुसँग स्वास्थ्य परामर्श लिएर सेवा शुभारम्भ गरे।

शुभारम्भपछि उनले भने,'नगरपालिकाको उद्देश्यअनुसार नगरवासीहरूलाई स्वास्थ्यसेवा सहजरूपमा उपलब्ध गराउने कार्यमा यस सेवाले थप बल पुर्‍याउँछ भन्ने विश्वास लिएको छु। भौगोलिक तथा यातायातको समस्या रहकेको हाम्रो जस्तो नगरमा वृद्धवृद्धा बालबालिका र शारीरिक रूपमा नगर अस्पतालसम्म पुग्न गाह्रो हुने नगरवासीलाई हाम्रो पात्रोसँगको सहकार्यमा प्रदान गरिएको यस सेवाले सहज हुनेछ।'

'नेपालका धेरै नगरपालिकाहरू हाम्रो पात्रो हेल्थमार्फत आफ्नो सेवा आफ्ना नगरवासीलाई उपलब्ध गराउन उत्सुक देखिनुभएको छ। आगामी दिनमा धेरै नगरपालिकाहरूले नगरभित्रका वृद्धवृद्धा, फरक शारीरिक क्षमता भएका व्यक्तिहरू, स्कुले बालबालिका, महिलाहरूलाई  नगरपालिकाभित्रका डाक्टरसँग निःशुल्क परामर्श सेवा उपलब्ध गराउनु हुनेछ। नेपालमा थप मानिसहरूलाई स्वास्थ्य सेवामा जोड्न पाउँदा हामी खुसी छौँ,' हाम्रो पात्रोको संस्थापकर सीईओ शंकर उप्रेतीले बताए।