नेकपा (माओवादी केन्द्र) का उपमहासचिव एबम् प्रधानमन्त्री पुष्पकमल दाहाल ‘प्रचण्ड’ का नवनियुक्त प्रमुख राजनीतिक सल्लाहकार हरिबोल गजुरेलले यो सरकार केही नयाँ काम गर्नेगरी निर्माण भएकाले नयाँ काम हुने बताएका छन् । मंगलबार एक कार्यक्रममा नेता गजुरेलले त्यस्तो बताए ।

प्रधानमन्त्री दाहालको कार्यकाल निकै चुनौतीपूर्ण भएको भए पनि उहाँमा काम गर्ने इच्छाशक्ति आफूले देखेको उनले बताए । संविधान कार्यान्वयन भइरहेको र यही कार्यकालमा शान्तिप्रक्रिया पनि टुंगो लाग्ने उनको भनाइ छ । 

‘प्रधानमन्त्री दाहाललाई यसपटक केही गर्नुपर्छ भन्ने भावना बोकेर हिँडेको देखेको छु’ नेता गजुरेलले भने, ‘काम गर्ने निकै जोखिम र चुनौती देखेको छु, जोखिमलाई चिर्न सकिन्छ भन्ने  आँट र हिम्मत लिएर म पनि जिम्मेवारीमा आएको छु ।’ सरकार अप्ठेरो परिवेशमा बनेको भएपनि केही काम गर्न सकिने उनले बताए ।

शान्तिप्रक्रियाको टुंगो र संघीयता कार्यान्वयनको जिम्मेवारी वर्तमान सरकारको काँधमा रहेको भन्दै उनले यी दुवै काम हुने विश्वास व्यक्त गरे । सबैको साथ, सहयोग र सदभावले नै सरकार सफल हुने उनले बताए । आफूले पाएको जिम्मेवारी ईमानदारिता र निष्ठापूर्वक आफ्नो क्षमताअनुसार काम गर्ने पनि उनले प्रतिवद्धता जनाए ।