कम्प्युटर एशोसिएशन अफ नेपाल महासंघको आयोजनामा आउँदो माघ २४ देखि २९ गते ६ दिनसम्म राजधानीको भृकुटीमण्डपमा २८औं संस्करणको क्यान इन्फोटेक–२०२३ हुँदैछ ।

सूचना प्रविधि सम्बन्धी बृहत् प्रदर्शनीका साथ प्रविधि उद्योग र एकेडेमियाबीचको अन्तरबारे छलफल पनि हुने भएको छ ।

क्यान महासंघले कोड फर चेन्जसँगको सहकार्यमा सेमिनार गर्न लागेको हो । यसअन्तर्गत माघ २५ देखि माघ २८ गतेसम्म हरेक दिन फरक–फरक विषयमा सरोकारवालाबीच छलफल एवं अन्तक्र्रिया हुने क्यान महासंघका महासचिव चिरञ्जीवी अधिकारीले जानकारी दिए ।

उनका अनुसार माघ २५ अर्थात् बुधवार प्रविधि उद्योग र एकेडेमियाबीच अन्तर्क्रिया विषयमा पहिलो सेमिनार आयोजना हुनेछ । नेपाल पर्यटन बोर्डको हलमा हरेक दिन २ घण्टासम्म हुने सेमिनारमा नेपाल दूरसञ्चार प्राधिकरणकी उपनिर्देशक तथा सेन्टर फर साइबर सेक्युरिटी एन्ड रिसर्च इनोभेसनकी उपाध्यक्ष रोजा किरण बासुकला, स्मार्ट च्वाइस टेक्नोलोजी लिमिटेडका प्रमुख कार्यकारी अधिकृत नारायणप्रकाश भुजु, टेक्सास कलेजका प्रिन्सिपल भेषराज पोखरेल, त्रिभुवन विश्वविद्यालयका उपप्राध्यापक नवराज पौडेल, नेपाल सरकारका आईटी निर्देशक सुवास ढकाल र कोड फर चेन्जका अध्यक्ष निराजन क्षेत्री वक्ताका रूपमा सहभागी हुनेछन् ।

कार्यक्रममा वर्तमान शिक्षा प्रणाली, आईटी बजारको माग र आवश्यकता, उद्योग र शिक्षण संस्थाबीच देखिएको दूरी, राज्यका नीति तथा कार्यक्रम लगायतका विषयमा छलफल हुनेछ ।

‘विद्यार्थीहरूलाई शिक्षण संस्थाले गर्ने अभ्यासहरूमा के छुटिरहेको छ भन्ने कुरा स्पष्ट पार्न कार्यक्रम उपयोगी हुने देखिएको छ,’ कार्यक्रम संयोजक निराजन क्षेत्रीले भने, ‘प्रविधि कम्पनीहरूमा काम गर्न के–के कुरा आवश्यक पर्छ भन्ने कुरा विद्यार्थीलाई देखाउन पनि छलफलले सहयोग गर्नेछ ।’

सेमिनारमा १५० भन्दा बढी व्यक्तिको सहभागिता हुने बताइएको छ । यसअन्तर्गत कार्यक्रममा सूचना प्रविधि क्षेत्रका विद्यार्थी, उद्यमी, पेशाकर्मी तथा प्रविधिप्रेमी जोसुकै आउनसक्ने कार्यक्रम संयोजक क्षेत्रीले बताए ।