कांग्रेसका मुख्य सचेतक रमेश लेखकले सरकारमा रहेका दलबीच उत्पन्न भइरहेको व्यापक विवादलाई अत्यन्तै सुक्ष्म ढंगले हेरिरहेको बताएका छन् ।

विपक्षी मोर्चाको बैठकपछि लेखकले गृहमन्त्रीको विषयमा सत्तारुढ दलभित्र देखिएको सैद्धान्तिक र वैचारिक विषयलाई अत्यन्तै नजिकबाट हेरिरहेको बताएका हुन् ।

‘गृहमन्त्रीको राजीनामापछि फेरि मन्त्री कसलाई बनाउने मात्रै होइन कि सरकारमा रहेका दलबीच सैद्धान्तिक र वैचरिक विषयमा व्यापक विवाद भएको छ । संघीय संसदमा त्यो विषय उठेको छ । गृहमन्त्रीको कुरा पनि आएको छ । यी सबै कुरालाई हामीले अत्यन्तै सूक्ष्म ढंगले हेरिरहेका छौं,’ उनले भने।  

विपक्षी मोर्चाको बैठकले पर्सी हुने राष्ट्रिय सभाका उपाध्यक्षको चुनावमा विपक्षी दलबाट उम्मेदवार अगाडि सार्ने विषयमा छलफल गरिरहेको जानकारी पनि दिए ।

‘प्रतिनिधिसभामा भएका विपक्षी दलका नेताहरुको बैठक सम्पन्न भएको हो । भोलि राष्टिय सभाको उपाध्यक्षका लागि मनोननयन पर्सी चुनाव हुँदैछ’, लेखकले भने, ‘उममेदवारीबारे एकसरो छलफल भयो । भोलि बिहानसम्म उम्मेदवारमा विपक्षी दलहरू एउटा निर्णय पुग्छन् ।’

कांग्रेस संसदीय दलको कार्यालय सिंहदरबारमा भएको छलफलमा कांग्रेस, नेकपा एकीकृत समाजवादी, लोकतान्त्रिक समाजवादी पार्टी र राष्ट्रिय जनमोर्चाका शीर्ष नेताहरू सहभागी थिए ।