संघीय मामिला तथा सामान्य प्रशासनमन्त्री अमन लाल मोदीले कर्मचारी सरुवाको निश्चित मापदण्ड बनाउने बताएका छन् । 

मोरङको तेतरीयास्थित ग्रामथान गाउँपालिकाको १२ औं गाउँसभालाई सम्बोधन गर्दै मन्त्री मोदीले कतिपय कर्मचारी वर्षौंसम्म एकै कार्यालयमा रहने र सरुवा पनि सुगम ठाउँमा मात्रै माग्ने विकृति देखिएको बताए। 

'कर्मचारीभित्र सरुवा गरेको ठाउँमा पनि नजाने, कतिपय ठाउँमा सधैँभरि बसिरहने र सुगम ठाउँमा मात्रै सरुवा मागेर जाने प्रचलन रहेछ,' मन्त्री मोदीले भने, 'कर्मचारी सरुवाको हामी निश्चित मापदण्ड बनाउन छलफल गर्दैछौँ ।'

स्थानीय तहका प्रमुख प्रशासकीय अधिकृतलाई केन्द्रले खटाउने कि प्रदेशलाई खटाउन दिने भन्ने विषयमा पनि छलफल भइरहेको मन्त्री मोदीको भनाइ थियो । संघीय निजामती ऐनमार्फत सबै विषयलाई व्यवस्थित बनाउने उनले बताए ।

संघीय निजामती ऐन संसदमा टेबुल गर्ने मन्त्री मोदीको अन्तिम तयारी छ ।

अर्को फरक प्रसंगमा मन्त्री मोदीले आफूले पार्टीगत आस्थाको आधारमा कसैलाई विभेद नगर्ने बताए । उनले भने, 'कसैलाई पनि पार्टीगत आस्थाको आधारमा विभेद गर्ने काम मबाट हुँदैन, यहाँको विकासका लागि सबै दलसँग मेरो सहकार्य हुन्छ ।'