एनआईसी एशिया लघुवित्त वित्तीय संस्था लिमिटेडको संस्थापक एनआईसी एशिया बैंक लिमिटेडको सञ्चालक समितिको ५९०औं बैठकको निर्णयअनुसार सन्तोषकुमार राठी र दिनेश भारीलाई संस्थापक समूहमा प्रतिनिधि सञ्चालक मनोनयन गरी पठाइएकोमा लघुवित्त वित्तीय संस्थाको सोमवारको १६६औं सञ्चालक समितिको बैठकले सञ्चालक पदको बाँकी रहेको कार्यकालसम्मका लागि नियुक्त गरेको छ ।

सञ्चालक समिति बैठकबाट नै संस्थाको नियमावलीमा भएको व्यवस्था बमोजिम सबै सञ्चालकहरूको सर्वसम्मतिमा सञ्चालक सन्तोषकुमार राठीलाई संस्थाको सञ्चालक समितिको अध्यक्ष चयन गरिएको छ ।

अध्यक्ष पदमा यसअघि सञ्चालकहरू कपिल ढकाल र प्रकाश बराल संस्थापक समूहमा संस्थापक एनआईसी एशिया बैंक लिमिटेडको तर्पmबाट प्रतिनिधित्व गर्दै आइरहेका थिए ।     

नवनियुक्त अध्यक्ष राठीले सोमवारै प्रचलित कानून तथा नियमानुसार नेपाल राष्ट्र बैंकको बैंक तथा वित्तीय संस्था नियमन विभागका कार्यकारी निर्देशक डा. गुणाकर भट्टसमक्ष शपथ ग्रहण गरी सोही दिनबाट पद बहाल गरेका छन् भने सञ्चालक दिनेश भारीले संस्थाका अध्यक्ष सन्तोषकुमार राठीसमक्ष शपथ ग्रहण गरी पद बहाल गरेका छन् ।

अध्यक्ष राठी र सञ्चालक भारी एनआई एशिया बैंकमा क्रमशः नायव प्रमुख कार्यकारी अधिकृत र प्रमुख कानून अधिकृतमा कार्यरत थिए । राठीसँग बैंकिङ क्षेत्रमा करीब २० वर्षको अनुभव रहेको छ भने भारीको कानून तथा बैंकिङ क्षेत्रमा करीब २२ वर्षको अनुभव छ ।

संस्थाका प्रमुख कार्यकारी अधिकृत लक्ष्मण चालिसेले १६६औं सञ्चालक समितिको बैठकमा उच्चतम बैंकिङ अनुभव प्राप्त व्यक्तिलाई संस्थाको सञ्चालकका रूपमा स्वागत गरेका थिए । उनीहरूको कार्य अनुभवबाट संस्थाले लिएको लक्ष्य हासिल गरी संस्थालाई लघुवित्तीय संस्थाहरूमाझ अग्रणी, सबल तथा सशक्त लघुवित्त संस्थाको रूपमा स्थापित गराउन अझै थप सहयोग पुग्ने संस्थाको विश्वास रहेको समेत जनाए ।

एनआईसी एशिया लघुवित्त वित्तीय संस्था लिमिटेडले मुलुकभर ७४ जिल्लामा २८७ शाखा कार्यालयमार्फत सेवा प्रदान गर्दै आइरहेको छ । वित्तीय संस्थाले कार्यक्रम विस्तार गर्दा लघुवित्तको पहुँच नपुगेको दुर्गम स्थानीय तहलाई प्राथमिकतामा राखेको छ ।