नेपाल राष्ट्र बैंकका गर्भनर महाप्रसाद अधिकारीले ‘२०४६ साल पछाडि फर्किन खोजेको हो' भन्दै प्रश्न गरेका छन्। 

शुक्रबारदेखि काठमाडौंमा शुरू दोस्रो अर्थशास्त्री सम्मेलनमा गभर्नर अधिकारीले २०४६ सालदेखि बजारले नै ब्याजदर तोक्ने गरी खुलाबजार अर्थतन्त्र अँगालेको स्मरण गराउँदै अहिले फेरि राष्ट्र बैंकले नियन्त्रण गर्नुपर्ने माग उठेको भन्दै यस्तो प्रश्न गरे। 

उनले आवश्यक स्थानमा राष्ट्र बैंकले नियमन र कडाइ गरिरहेको स्पष्ट पारे।

उनले अहिले लङ टर्म इन्भेष्टमेन्टबारे सोचिरहेकाले ऋणलाई जथाभावी प्रयोग गर्दा समस्यामा पर्नसक्ने बताए। उनलेआवाजविहीनहरूको र साना लगानीकर्ताहरूका लागि २ करोडभन्दा कम लगानी गर्नेहरूको लागि बेस रेटमा २ प्रतिशतभन्दा बेसी चार्ज गर्न नपाउने व्यवस्था गरेको पनि बताए। 

गभर्नर अधिकारीले पछिल्लो समय अर्थतन्त्रमा सुधार हुँदै गइरहेको पनि बताए।

उनले नेपाल समान देशको तुलानमा नेपालको अर्थतन्त्र सुधार भइरहेको उल्लेख गरे।

पुस मसान्तको डेटाअनुसार नै झन्डै एक खर्बको शोधानान्तर बचत रहेको भन्दै गत सालको पुस मसान्तमा २४१ अर्बको घाटा रहेको स्पष्ट पारे। उनले अर्थतन्त्रका बाह्य क्षेत्रको तथ्यांक सुधार भएर गएको पनि बताए।

'करिब १० महिनाको आयातलाई धान्न सक्ने क्षमता'

गभर्नर अधिकारीले नेपाल अहिले करिब १० अर्बभन्दा बढी डलरको सञ्चितिमा रहेको भन्दै करिब १० महिनाको आयातलाई धान्न सक्ने क्षमतामा रहेको बताए। 

उनले भने, ‘यही बेला पोहोर साल मलाई सोध्नुहुन्थ्यो भने मैले यो तथ्यांक अर्कै बताउनु पर्दथ्यो, हामी अर्कै ठाउँमा थियौँ । तर हामी अहिले सहज अवस्थामा छौँ । हामी पुस मसान्तको डेटाअनुसार नै झन्डै एक खर्बको शोधनान्तर बचत छ । जुन डेटा गत सालको पुस मसान्तमा हेर्नुभयो भने २४१ अर्बको घाटामा थियौँ । माघको तथ्यांक केही दिनभित्रै आउँदैछ । मलाई लाग्छ अहिलेसम्मको इन्डिकेटिभ तथ्यांकअनुसार यो थप सुधार भएर आउनेछ ।'

गभर्नर अधिकारीले अर्थतन्त्रका संरचनागत विषयमा धेरै सुधार गर्न जरुरी रहेको बताए।

उनले अर्थतन्त्र अहिले सहज स्थितिमा रहेको भन्दै सबै कुरामा नकारात्मक रुपले नहेर्न पनि आग्रह गरे।