न्यायिक समितिमा आउने गरेका विषय र त्यसको समाधानका उपायका विषयमा छलफल गर्ने उद्देश्यले काठमाडौं महानगरपालिकाले चैत १५ र १६ गते काठमाडौंमा राष्ट्रिय न्यायिक समिति सम्मेलन गर्ने तयारी गरेको छ । 

सम्मेलनमा सहभागिताका लागि महानगरले ७५२ वटै स्थानीय तहलाई निमन्त्रणा पत्र पठाइसकेको उपप्रमुख सुनिता डंगोलले जानकारी दिइन् ।

‘सबै पालिकालाई इमेलमार्फत निमन्त्रणा पत्र पठाएका छौं,’ उपप्रमुख डंगोलले भनिन्, ‘पत्रमा सबै पालिकाबाट संयोजक वा सदस्यमध्येबाट सहभागिता जनाउन अपिल गरिएको छ ।’

स्थानीय सरकारमा अहिले प्रयोगमा आएको न्यायिक प्रणालीलाई अझ प्रभावकारी कसरी बनाउन सकिन्छ, यसका चुनौतीहरू के–के छन् भन्ने विषयसहित मुख्यगरी ४ विषयमा छलफल केन्द्रित रहने छ । 

सम्मेलनमा मुलुकभरका पालिका र सम्बन्धित व्यक्तिहरूसहित १ हजारको हाराहारीको सहभागिता रहने अपेक्षा गरिएको डंगोलले जानकारी दिइन् । सम्मेलनको तयारीका लागि महानगर उपप्रमुख डंगोलको अध्यक्षतामा ‘न्यायिक समिति मूल समारोह समिति’ गठन भइसकेको छ ।

सम्मेलनबाट काठमाडौं विवाद निरुपण घोषणापत्र २०७९ जारी गर्ने तयारी छ । 

न्यायिक समितिसँगै सम्बन्धित भएर न्यायिक समितिबारे जनचेतना फैलाउने उद्देश्यले कलाकारद्वय मदनकृष्ण श्रेष्ठ र हरिवंश आचार्यको सहयोगमा डकुमेन्ट्री समेत तयार गर्दै गरेको पनि महानगरले जानकारी दिएको छ ।