नेपालीलाई भुटानी शरणार्थी बनाएर अमेरिका लैजाने भन्दै ५० करोड रुपैयाँ भन्दा धेरै पैसा ठगी गरेको आरोपमा ३ जनलाई काठमाडौं उपत्यका अपराध अनुसन्धान कार्यालयले केही दिनअघि पक्राउ गर्‍यो । 

गिरोहले अमेरिका नपठाएपछि पीडितले अपराध अनुसन्धान कार्यालयमा उजुरी दिएपछि उनीहरूको पोल खुलेको कार्यालयका प्रमुख प्रहरी वरिष्ठ उपरीक्षक (एसएसपी) डा. मनोजकुमार केसीले बताए । 

‘उहाँहरू अमेरिका जान नपाउने अवस्था देखेपछि हामीकहाँ उजुरी दिन आउनुभएको थियो,’ एसएसपी केसीले लोकान्तरसँग भने । 

अपराध अनुसन्धान कार्यालयका अनुसार ठगिएको भन्दै ८१ जनाले निवेदन दिएका थिए । 

‘हामीकहाँ १० महिना अगाडिदेखि निवेदन आएको थियो । त्यो बीचमा अनुसन्धान चलिरहेको थियो । हामीले केही प्रमाण जुटाएपछि अभियुक्तहरूलाई पक्राउ गरेका हौँ,’ एसएसपी केसीले भने, ‘पछिल्लो ३ महिनादेखि सक्रिय रूपमा अनुसन्धान गरेर पक्राउ गर्न सफल भएका हौं ।’ 

गिरोहले प्रतिव्यक्ति १५ देखि २० लाख रूपैयाँ लिएर अमेरिका पठाइदिने भन्दै पीडितहरूलाई भुटानी शरणार्थीको परिचयपत्र पनि दिएका छन् ।

अनुसन्धानमा खटिएका प्रहरी अधिकारीहरूका अनुसार उनीहरूसँग भएको परिचयपत्र सक्कलीजस्तै देखिएको छ । त्यो उनीहरूले कसरी बनाए भन्ने विषयमा अनुसन्धान भइरहेको छ । 

‘पीडितहरूलाई भुटानी शरणार्थीको कार्ड उपलब्ध गराइएको पाइएको छ तर त्यो सक्कली वा नक्कली हो भन्ने अवस्था छैन । त्यसको अनुसन्धान भइरहेको छ,’ एसएसपी केसीले भने ।  

मोरङ पथरीबाट २ करोड रुपैयाँ ठगिएको भन्दै ९ जनाको टोलीले अपराध अनुसन्धान कार्यालयमा निवेदन दिएको छ ।

पोखरा र रामेछापबाट पनि ठगिएको भन्दै उजुरी दिन आउन लागेको जानकारी गराएको एसएसपी केसीले बताए । 

प्रहरीले १२ गते उक्त अभियोगमा ललितपुर महालक्ष्मी नगरपालिका-४ सीतापाखा हाइट बस्ने ५० वर्षीय सानु भण्डारी, मोरङ पथरी शनिश्वरे नगरपालिका-१० का ४९ वर्षीय केशवप्रसाद दुलाल र पाँचथर फिदिम नगरपालिका-७ का ४५ वर्षीय टंककुमार गुरुङलाई पक्राउ गरेको थियो । 

पक्राउ परेका उनीहरूले गृहमन्त्रालयमा उच्च अधिकारी र कर्मचारीहरूको नामसमेत खोलेका थिए । शरणार्थी समितिका उच्च अधिकारीहरूसँग सेटिङ भइरहेको भन्दै गृह मन्त्रालय, श्रम मन्त्रालय र शरणार्थीसँग सम्बन्धित निकायहरूको कागज पत्रहरूसमेत बरामद भएको अपराध अनुसन्धान कार्यालयले जनाएको छ । 

भुटानी शरणार्थी बनाएर अमेरिका पठाउने काममा गृह मन्त्रालयका तत्कालीन पदाधिकारी र शरणार्थी समस्या समाधानसम्बन्धी कार्यदलका समदस्यहरूको मिलेमतो देखिएकाले अनुसन्धान भइरहेको एसएसपी केसीले बताए ।