पाख्रिन तामाङ समाजको आयोजनामा चैत १८ गते शनिबार एक दिन बृहत् जनजाति कप ब्याडमिण्टन प्रतियोगिता महोत्सव हुने भएको छ। 

प्रतियोगिता ललितपुरस्थित रिभाइभ लिजर पार्कको हलमा हुने आयोजक तथा पाख्रिन तामाङ समाजका अध्यक्ष शुक्र तामाङले जानकारी दिए। 

समाजले आदिवासी जनजाति समुदायमा सूचीकृत जाति विशेष टिमका आधारमा प्रतियोगिता गराउने जनाएको छ।

जाति विशेषबाट टिम सहभागी हुन सक्ने र टिम जोडीको उमेर (दुवै खेलाडीको उमेर जोड गर्दा ८० वर्ष कम्तीमा पूरा) भएको हुनुपर्ने मापदण्ड बनाइएको छ। 

खेल प्रतियोगिता १ दिनको हुनेछ भने सहभागी खेलाडीलाई ब्रेक फास्ट तथा खानाको व्यवस्था आयोजकले प्रबन्ध मिलाइएको पाख्रिनले जानकारी दिए।

साथै विजेता, उपविजेता र तेस्रो हुने टिमलाई कप, मेडल, प्रमाण पत्रलयायत आकर्षक पुरस्कार प्रदान गरिने आयोजकले बताएको छ। 

'नेपालमा हजारौँ वर्षदेखि आदिवासी जनजाति समुदायलगायत अन्य जाति फरक फरक भाषा, संस्कृति, परम्परा, भेषभूषा, धर्म तथा पहिचान भए पनि आपसमा मिलेर सद्भावपूर्ण तरिकाले बसोबास गरिरहेका छन्। यस मैत्रीपूर्ण सद्भावलाई यस खेल प्रतियोगिताले अझ प्रगाढ बनाउनेछ,' पाख्रिनले भने।