मन्त्रिपरिषद् विस्तार गर्दै प्रधानमन्त्री, कुन दलले कति पाउँदैछन् मन्त्रालय ?

गठबन्धनमा आबद्ध दलले नाम दिए प्रधानमन्त्री पुष्पकमल दाहाल 'प्रचण्ड'ले आजै मन्त्रिपरिषद् विस्तार गर्दै छन्। 

बुधबार बेलुकाको गठबन्धन दलको बैठकमा दलले पाउने मन्त्रालयको संख्या टुंगो लागिसकेको जनाइएको छ। तर कुन दलबाट को सहभागी हुने र के मन्त्रालय पाउने भन्ने निर्णय बिहीबार दिउँसोसम्म लिएर साँझ मन्त्रिपरिषद् विस्तार गर्ने तयारीमा प्रधानमन्त्री प्रचण्ड छन्।

प्रचण्डले नै सबै दलले नाम दिए आजै साँझसम्म मन्त्रिपरिषद् विस्तार गर्ने बताएका छन् । चितवनबाट फर्किएपछि सरकार विस्तार गर्ने उनको तयारी छ । १५ फागुनमा एमालेका मन्त्रीले राजीनामा दिएपछि एक महिनादेखि १६ वटा मन्त्रालयको जिम्मा प्रधानमन्त्रीको काँधमा छ । यसैले उनलाई छिटो सरकार विस्तार गर्नुपर्ने चुनौती छ । 

दलहरूलाई नाम दिन प्रधानमन्त्रीले आग्रह गरेपछि सबैभन्दा ठूलो दल कांग्रेसले पनि आन्तरिक छलफल गरिरहेको छ । 

सरकार विस्तारमा सबैभन्दा ठूलो दल कांग्रेसले ८ वटा मन्त्रालय पाउँदैछ ?

माओवादीले ४, नेकपा एस र जसपालाई २-२ मन्त्रालय पाउँदैछन् । लोसपा, जनमत, नागरिक उन्मुक्ति, नेपाल समाजवादी पार्टीलाई १-१ र एक स्वतन्त्र सांसदलाई प्रधानमन्त्रीले मन्त्री बनाउने तयारी गरेका छन् । यसअघि नै माओवादीका ४ मन्त्री र एक राज्यमन्त्री छन् । अब जनमतले एक राज्यमन्त्री पाउनेछ । 

यसअघि एमालेले लिएका मुख्य मन्त्रालय नै कांग्रेसको भागमा पर्ने देखिएको छ । 

कांग्रेसले अर्थ, परराष्ट्र, स्वास्थ्य, रक्षा, कानुन जस्ता मुख्य मन्त्रालय पाउँदैछ ।  कृषि तथा पशुपन्छी, उद्योग वाणिज्य तथा आपूर्ति र महिला बालबालिका तथा ज्येष्ठ नागरिक पनि कांग्रेसकै दाबी छ । 

कांग्रेसले पाउने ८ मन्त्रालयमा शेखर पक्षले २ मन्त्रालय पाउँदैछन् । कांग्रेसबाट पूर्णबहादुर खड्का, डा. प्रकाशशरण महत, धनराज गुरुङ, सीता गुरुङ, रमेश रिजाल, किशोरसिंह राठौर, एनपी साउद मन्त्री बन्ने बताइन्छ ।

तर देउवाले नै कसलाई मन्त्री बनाउने भन्ने टुंगो लगाउन आन्तरिक छलफल गरिरहेका छन् । कांग्रेसले भूगोल, समावेशी, योग्यता र क्षमताको आधारमा उम्मेदवार तय गर्ने मापदण्ड बनाएको छ । 

भौतिक पूर्वाधार छोडेर माओवादीले गृह मन्त्रालय लिँदैछ । माओावदीबाट यसअघि नै चार मन्त्री छन् । जसमा भौतिक पूर्वाधारमा नेकपा एस र जसपाको दाबी अझै कायम भएको बताइन्छ ।

नेकपा एसबाट वेदुराम भुसाल र प्रकाश ज्वाला मन्त्री बन्दैछन् । 

लोसपाबाट श्रम मन्त्रालय लिएर शरतसिंह भण्डारी सरकारमा सहभागी हुँदैछन् । जनमतबाट अब्दुल खान खानेपानी मन्त्री छन् । माओवादीले छोडेपछि भौतिक पूर्वाधार मन्त्री नेकपा एसले पाउने देखिएको छ ।