पुष्पकमल दाहाल प्रचण्ड नेतृत्वको सरकारमा कांग्रेसबाट उपसभापति पूर्णबहादुर खड्का उपप्रधानमन्त्रीसहित रक्षा लिएर जाने भएका छन् । 

गृहका लागि निकै ताकेता गरे पनि खड्का रक्षा मन्त्रालय लिएर सरकारमा जान लागेका हुन् ।

प्रवक्ता डा प्रकाशशरण महत अर्थमन्त्री बन्ने भएका छन् । 

‘यस अघिदेखि नै उहाँ उपप्रधानमन्त्रीसहित गृहमन्त्री लिएर सरकारमा जाने तयारीमा हुनुहुन्थ्यो’, देउवानिकट स्रोतले भन्यो, ‘तर गृह माओवादीको भागमा परेपछि उपप्रधानमन्त्रीसहित रक्षामन्त्रालयको उपसभापति खड्का जाने लगभग टुंगो लागिसक्यो । अन्तिम निर्णय हुन मात्रै बाँकी हो ।’ 

सरकार विस्तारमा अन्तिम भागबन्डाका लागि बालुवाटारमा सत्तारुढ गठबन्धनको बैठक बसिरहेको छ । 

२१ मन्त्रालयमा कांग्रेसले ८, माओवादीले ४, नेकपा एस र जसपाले २-२, जनमत, लोसपा, नागरिक उन्मुक्ति, नेपाल समाजवादी पार्टी र आम जनता पार्टीले १-१ मन्त्रालय पाउँदैछन् ।