आगामी आर्थिक वर्ष २०८०/८१ को बजेट निर्माणको कार्यतालिका तय भएको छ । अर्थ मन्त्रालयले १ चैतदेखि १५ जेठसम्म बजेट निर्माणको काम गर्ने कार्यतालिका बनाएको हो । 
यस्तो कार्यतालिका अनुसार २० चैतभित्र विभिन्न राजस्व परामर्श सम्बन्धीका उपसमितिले दिएको प्रतिवेदन पेश गर्ने रहेको छ । 

प्रदेश र स्थानीय तहलाई दिने सशर्त अनुदान, मन्त्रालयगत बजेट, कार्यक्रम शीर्षकसहितमा छलफल गर्ने कार्यसूची अर्थ मन्त्रालयले तय गरेको छ । २६ चैतदेखि २५ वैशाखभित्रमा बजेटमा सुझाव संकलन गर्ने भएको छ । यस समयभित्र पूर्व अर्थमन्त्री, पूर्व गभर्नर, अर्थशास्त्रीसहितसँग छलफल गर्ने कार्यतालिका अर्थ मन्त्रालयले तय गरेको छ । बजेट सुझाव संकलनसँगै २० वैशाखसम्ममा सार्वजनिक संस्थानको  प्रगति विवरण तयार पार्ने भएको छ । 

मन्त्रालयले ३० वैशाखभित्र आर्थिक सर्वेक्षण तयार गर्ने र मन्त्रालयको प्रगति विवरण तयार पार्ने भएको छ । जेठ १ मा बजेट वक्तव्यको पहिलो मस्यौदा तयार गर्ने कार्यतालिका छ । ६ जेठमा राष्ट्रपतिलाई बजेटको मस्यौदा तयार गरेर ब्रिफिङ गर्ने भएको छ । १० जेठमा राष्ट्रपतिलाई बजेटको ब्रिफिङ गर्ने  छ । 

यसैगरी १३ जेठमा बजेट वक्तव्यलाई अन्तिम रुप दिने र १५ जेठमा संघीय संसदको दुबै सदनमार्फत अर्थमन्त्रीले बजेट सार्वजनिक गर्ने गरी कार्यतालिका बनाएको मन्त्रालले उपलब्ध गराएको कार्यतालिकामा उल्लेख छ ।