प्रधानमन्त्री पुष्पकमल दाहाल प्रचण्डले अहिले नै नवनियुक्त मन्त्रीहरुलाई आफूले बधाई नभन्ने बताएका छन् । मन्त्रिपरिषद्को सोमबार बसेको बैठकलाई सम्बोधन गर्दै प्रचण्डले मन्त्रीहरुलाई अहिले आफूले स्वागत मात्रै गर्ने बताए । 

‘म सबै माननीय मन्त्रीज्यूहरुलाई यो बैठकमा हार्दिक स्वागत गर्दछु। बधाई अहिले म भनिहाल्दिनँ, किनकि त्यसका लागि पहिले हामीले आफ्नो भूमिकामाथि न्याय गर्दै राष्ट्रले दिएको परीक्षा उत्तीर्ण गर्नु छ’, बैठकमा प्रचण्डले भने । 

उनले अहिले राष्ट्र चौतर्फी सङ्कटमा रहेको उल्लेख गर्दै खादा मालामा भुल्न मन्त्रीहरुलाई समय नभएको बताए । ‘यो पद अहिले हाम्रा लागि पुरस्कार होइन, चुनौती हो भन्ने मान्यौं र त्यसै अनुसार परिणाममुखी भएर अघि बढ्यौं भने मात्र हामी बधाईका हकदार बन्नेछौं’, प्रचण्डले भने ।  

बैठकमा प्रचण्डले संविधानको धारा ७६ को उपधारा (१०) को भावना र मर्म बमोजिम मन्त्रालयका नीतिगत निर्णय र काम प्रधानमन्त्रीसँग अग्रिम समन्वय, सल्लाह र सहमतिका आधारमा गर्न निर्देशन पनि दिए । 

प्रचण्डले वर्तमान सरकार गठबन्धन सरकार भएकाले दलहरुबीच वैचारिक भिन्नता हुनु सामान्य भएको बताए । तर, ती विमति र मतभेदहरुको प्रभाव सरकार सञ्चालनमा कतै पनि पर्न नहुनेमा प्रचण्डले जोड दिए । प्रचण्डले अनावश्यक आक्षेप, तडकभडक र विवादबाट जोगिन पनि आग्रह गरे । 

‘यसअघि संघीय संसद, संविधान र लोकतन्त्रमाथिकै आक्षेपपूर्ण व्यवहार र अभिव्यक्तिले यो गठबन्धनलाई ब्युँताउने परिस्थिति बनेको हो। यो गठबन्धनका पछाडि संविधान, लोकतन्त्र र समग्रमा राष्ट्रकै रक्षाको एउटा वृहत् अभियान र वैचारिकी छ’, प्रचण्डले भने, ‘संविधान र लोकतन्त्रविरुद्धका षड्यन्त्रलाई परास्त गर्दै आगामी पाँच वर्षसम्म गठबन्धनकै सरकारबाट राजनीतिक स्थायित्व दिनु हाम्रो जिम्मेवारी हो।’

यस्तै  शान्ति प्रक्रियालाई तार्किक निष्कर्षमा पुर्‍याएर राजनैतिक उपलब्धिलाई संस्थागत गर्दै जनताको जीवनस्तरमा देखिने गरी सुधार ल्याउन सरकार दृढसंकल्पित हुनुपर्ने प्रचण्डले धारणा राखे ।