चलचित्र ‘प्रसाद २’ आउँदो शुक्रबारबाट प्रदर्शनमा नआउने भएको छ ।

उच्च अदालत पाटनले प्रदर्शन रोक्न अल्पकालीन आदेश जारी गरेको हो।

फिल्मका निर्माता सुवास थापाले आफ्नो रकम नदिई चलचित्र अनुमतिविना रिलिज गर्न लागेको भन्दै केशव पाण्डेले उच्च अदालत पाटनमा रिट दायर गरेका थिए । 

मंगलबार न्यायाधीश सुदर्शनराज पाण्डेको इजलासले ‘प्रसाद २’ को प्रदर्शन रोक्न अल्पकालीन आदेश दिएको हो ।

उच्च अदालत पाटनकी प्रवक्ता मन्दिरा शाहीका अनुसार उनको रिटमा थप सुनुवाइ गर्न अदालतले २६ गते आइतबार दुवै पक्षलाई बोलाएको छ । 

फिल्म निर्माण हुनुअघि पाण्डेलाई उक्त चलचित्रको निर्माताका रूपमा चिनाइएको भए पनि अहिले निर्माताका रुपमा उनको नाम छैन । 

अदालतमा रिट दायर गर्नुअघि उनले चलचित्र विकास बोर्डमा पनि उजुरी गर्न खोजेका थिए । तर बोर्डले उजुरी दर्ता नगरेपछि पाण्डे चलचित्रको प्रदर्शन रोक्नुपर्ने माग राखेर उच्च अदालत पुगेका थिए ।

चलचित्रका निर्माता सुवास थापाविरुद्ध आर्थिक लेनदेन र बैंकिङ कसूर मुद्दामा प्रहरीले केही दिनअघि पक्राउ पुर्जी जारी गरेको थियो । उनलाई प्रहरीले खोजिरहेको भए पनि फेला पार्न सकिरहेको छैन ।