नेपाल आयल निगमले हवाई इन्धनको मूल्य घटाएसँगै एयरलाइन्सको हवाई भाडा घटेको छ ।

वायुसेवा सञ्चालक संघले आजदेखि लागू हुने गरी हवाई भाडा समायोजन गरेको हो । 

निगमले सोमवार हवाई इन्धनमा प्रतिलिटर १० रुपैयाँ कटौती गरेको थियो । सोअनुसार काठमाडौंबाट धनगढीको उडानमा सबैभन्दा धेरै ४४० रुपैयाँ भाडा घटेको छ । यसअघि धनगढी रुटमा यात्रुले हवाई यात्राका लागि मात्र ७ हजार ५१० तिर्नुपथ्र्यो भने अब ७ हजार ७० रुपैयाँ भाडा कायम गरिएको छ ।

काठमाडौंबाट हुने पर्वतीय उडान (माउन्टेन फ्लाइट) को भाडा ३४५ रुपैयाँ घटेर अधिकतम भाडा ५ हजार ४९० कायम भएको छ । काठमाडौं–भद्रपुर रुटमा ३००, विराटनगरमा २४०, जनकपुरका लागि १३०, पोखराका लागि १५५, भरतपुरका लागि ११०, भैरहवाको २०५, नेपालगञ्जका लागि १८५ र सुर्खेतका लागि ३४५ रुपैयाँ हवाई भाडा घटेको छ ।