प्रतिनिधि सभालाई प्रभावकारी बनाउन सभामुख देवराज घिमिरेले सत्तापक्ष र प्रतिपक्षसँग संयुक्त परामर्श थालेका छन् ।

शनिवार आफ्नै कार्यकक्षमा प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीलाई राखेर सभामुख घिमिरेले छलफल गरेका छन् ।

संसदलाई कसरी प्रभावकारी बनाउने भन्ने विषयमा सभामुखले छलफल गरेका सभामुखका प्रेस विज्ञ शेखर अधिकारीले जानकारी दिए ।

सभामुखले बोलाएको छलफलमै नेकपा एमाले र नेकपा माओवादी केन्द्रको सत्ता गठबन्धन टुटेपछि शनिवार पहिलोपटक प्रचण्ड र ओलीबीच जम्काभेट भएको छ ।

नेकपा एमालेको समर्थनमा प्रधानमन्त्री बनेका प्रचण्डले राष्ट्रपति निर्वाचनमा नेपाली कांग्रेसका उम्मेदवार रामचन्द्र पौडेललाई सघाउँदा गठबन्धन टुटेको थियो । फागुन २६ गते प्रधानमन्त्री प्रचण्डले दोस्रोपटक विश्वासको मत लिने दिन ओली बधाई समेत नदिई बाहिरिएका थिए ।