सञ्चार तथा सूचना प्रविधि मन्त्री रेखा शर्माले काठमाडौं महानगरपालिकाले सिंहदरबारभित्रको फोहोर नउठाएर जनस्वास्थ्यमाथि खेलवाड गरेको बताएकी छन्। ​

बिहीवार मन्त्रिपरिषद् बैठकको निर्णय सार्वजनिक गर्न मन्त्रालयमा आयोजित पत्रकार भेटघाट कार्यक्रममा उनले गर्मीको समयमा त्यसरी फोहोर नउठाउनाले आम जनताको स्वास्थ्यमा असर पर्ने भन्दै यस्तो गर्नु राम्रो नभएको बताइन्। 

उनले कुनै अर्को उद्देश्य पूर्तिका लागि फोहोर नउठाएर हड्तालको विषय बनाइएको बताइन्।

महानगरपालिकाको मेयरले भनेको विषय टुंगिएन भनेर जनताको स्वास्थ्यमाथि खेलवाड गर्न नपाइने उनको भनाइ थियो। संघीय सरकारले सहजीकरण गरेर टुंग्याउनुपर्ने विषयमा छलफल गर्नुपर्ने उनले बताइन्।

संविधान, कानून र स्थानीय सरकार सञ्चालन ऐन बुझेर काम गर्न उनले मेयर बालेन शाहलाई आग्रह गरिन्। 

'सत्ता गठबन्धनमा कुनै समस्या छैन'

मन्त्री शर्माले सत्तारुढ गठबन्धनबीच कुनै समस्या नभएको पनि बताइन्। सत्तारुढ गठबन्धनका शीर्ष नेताबीच सरकार सञ्चालनको सम्बन्धमा आवश्यक संवाद र छलफल भइरहेको भन्दै उनले सरकारले सेवा प्रवाहका काम, नीतिगत, कानूनी कामहरु र बजेट निर्माणको कामलाई उच्च प्राथमिकतामा राखेर काम गरिरहेको उल्लेख गरिन्। सत्तारुढ गठन्धनका दलहरूसहित अन्य दलसँग समेत देशको अर्थतन्त्र सुधारलगायत विषयमा सरकारले गम्भीरतापूर्वक छलफल गरिरहेको उनले बताइन्।