नेपाल वायुसेवा निगमले दुई न्यारोबडी र वाइडबडी जहाजका लागि लिएको ऋणको चैत महिनाको किस्ता तिरेको छ । निगमको व्यवस्थापन वर्तमान नेतृत्वले सम्हालेपश्चात निगमको व्यापार विस्तार तथा नगद प्रवाहमा क्रमिक सुधार भएसँगगै निगमले अन्तर्राष्ट्रिय उडानको लागि खरिद गरेका दुई न्यारोबडी र दुई वाइडबडी जहाजको लागि लिएको ऋण दायित्वको चैतको किस्ता तिरेको जनाएको छ । 

‘२०७९ चैत्र महिनाको किस्ताबापत मिति २०७९ चैत्र ३० गते कर्मचारी सञ्चय कोष र नागरिक लगानी कोषलाई जम्मा रु ५३ करोड ९ लाख ५५ हजार २८१ रुपैयाँ रकम भुक्तानी गरेको छ’ निगमले जारी गरेको विज्ञप्तिमा उल्लेख छ, ‘२०७९ सालको को आषाढमा रु १ अर्व ३५ करोड रुपैयाँ, आश्विनमा रु ७३ करोड ९ लाख पचपन्न हजार दुई सय एकासी रुपैयाँ, पौषमा रु ३३ करोड ९ लाख पचपन्न हजार दुई सय एकासी रुपैयाँ र चैत्रमा ५३ करोड ९ लाख ५५ हजार दुई सय एकासी रुपैयाँ गरी जम्मा २ अर्व ९४ करोड २८ लाख ६५ हजार आठ सय चौवालिस रुपैयाँ रकम भुक्तानी गरेको छ ।’ 

विश्वव्यापी कोरोना भाइरसको कारण निगमको व्यापारमा समेत प्रतिकुल असर परेकोले सो असर रहेको अवधिको व्याजको व्याज, हर्जाना र पेनल छुट गरी सहयोग गरिदिन एवं किस्ताको संख्या वृद्दि गरेर ऋण दायित्व भुक्तनीलाइ सहजीकरण गरिदिन समेत निगमले कर्मचारी सञ्चय कोष र नागरिक लगानी कोषलाई अनुरोध पत्र पठाएको जनाएको छ । यस सम्बन्धमा छलफल समेत भइरहेको निगमको भनाइ छ ।