नेकपा एमालेका महासचिव शंकर पोखरेलले आफू र उपाध्यक्ष विष्णु पौडेलबीच कुनै मनमुटाब नभएको दाबी गरेका छन् ।

पौडेल र पोखरेलबीच काे पार्टीमा अगाडि जाने भन्ने प्रतिष्ठाको लडाइँ भएको चर्चा भइरहेको बेला महासचिव पोखरेलले आफूहरूबीच पार्टीका हरेक काम सहमतिमै हुने गरेको दाबी गरेका हुन् ।  

एमाले लुम्बिनी प्रदेशको 'मिसन ग्रासरूट' समीक्षा बैठकलाई बिहीबार बुटवलमा सम्बोधन गर्दै पोखरेलले भने, ‘हरेक कुरामा विष्णुप्रसाद पौडेल र म सल्लाह गरेर, निर्णय गर्नुअघि कैयौंपटक अनौपचारिक समेत छलफल गरेर टुंगोमा पुग्ने गरेका छौं । आपसमा कुनै मतभेद छैन । तर, कतिपयले तानातान छ भनेर हल्ला गरिदिन्छन् ।’

राजनीतिमा पैसावाला प्रवृत्ति हावी हुँदै गएको भन्दै यसलाई रोक्न आवश्यक रहेको उनको भनाइ छ । 

‘पैसावालाले मात्रै चुनाव जित्ने भनेर टिकट दिने प्रवृत्ति फेर्नुपर्छ ।’ पूर्व मुख्यमन्त्री समेत रहेका पोखरेलले भने ।

अब आउँदो निर्वाचनमा एमालेले बहुमतको सरकार बन्ने गरी अगाडि बढन आवश्यक रहेको समेत उनले बताए । 

‘बहुमतको, सरकार बनाउन जनमत वृद्वि गर्ने महत्वपूर्ण हो’ महासचिव पोखरेलले भने, ‘चुनाव पार्टीको विषय बन्नुपर्छ । चुनाव पैसावाला उम्मेदवारकाे भन्दा  नीतिगत हो भनेर बुझन जरूरी छ ।’

बलियो राष्ट्रिय शक्तिको नेतृत्व अब एमालेले मात्र गर्न सक्ने दाबी पोखरेलले गरे ।