राष्ट्रपति रामचन्द्र पौडेलले प्रतिनिधि सभाको सचिवमा पद्मप्रसाद पाण्डेय र राष्ट्रिय सभाको सचिवमा डा. सुरेन्द्र अर्याललाई नियुक्त गरेका छन् ।

राष्ट्रपति पौडेलले प्रतिनिधिसभा सभामुखको सिफारिसमा पाण्डेय र राष्ट्रियसभा अध्यक्षको सिफारिसमा डा. अर्याललाई संविधानको धारा १०६ को उपधारा १ बमोजिम सचिव पदमा नियुक्त गरेका हुन् ।

राष्ट्रपतिले महान्यायाधिवक्ताको कार्यालयको नायब महान्यायाधिवक्तामा कार्यरत पाण्डेय र संघीय संसद् सचिवालयमा सहसचिव पदमा कार्यरत डा. अर्याललाई बिहीवार सचिवमा नियुक्त गरेका संसद् सचिवालयका सहायक प्रवक्ता दशरथ धमलाले जानकारी दिए ।

सरकारी वकिल समूहबाट सहन्यायाधिवक्तामा खुलाबाट प्रवेश गरेका पाण्डेयसँग यसअघि अख्तियार दुरुपयोग अनुसन्धान आयोगमा काम गरेको अनुभव छ भने डा. अर्याल प्रतिनिधि सभाको अर्थ समितिको सचिवका रूपमा लामो समयदेखि कार्यरत थिए ।