नेपाली कांग्रेसका नेता डा. शेखर कोइरालाले मानव तस्करी जस्तो घृणित कार्यले विश्वसामु नेपालको शिर निहुरिएको टिप्पणी गरेका छन् ।

सामाजिक सञ्जालमा लेख्दै कोइरालाले लज्जित हुने गरी भएको नक्कली भुटानी शरणार्थी ठगी प्रकरणमा जोडिएका जोसुकैमाथि पनि कडा कारवाही हुनुपर्ने बताए । 

‘भ्रष्टाचारले आक्रान्त नेपाली समाजलाई राज्य नै सञ्जाल खडा गरेर मानव तस्करी जस्तो घृणित कार्यमा संलग्न भएको घटनाले विश्व समुदायसामु देशको शिर निहुरिएको छ, हामी लज्जित भएका छौं,’ कोइरालाले भनेका छन्, ‘तसर्थ राज्यको जुनसुकै तह र तप्काको जो कोहीलाई पनि कानूनको कठघरामा ल्याएर तिनलाई कडाभन्दा कडा सजाय दिनुपर्दछ ।’

शासक र प्रशासकप्रति नागरिकताको चरम अविश्वास रहेको पनि उनको भनाइ छ । 

‘यो देशका शासक र प्रशासकप्रति आम नागरिकको चरम अविश्वास बढ्दो छ, यसले हामीले दशकौं संघर्ष गरेर ल्याएको लोकतन्त्र र संविधानलाई असुरक्षित पारेको छ,’ उनले भनेका छन्, ‘अब समय आएको छ, भ्रष्टाचारविरुद्ध आम नागरिकसँग एकाकार गर्दै राष्ट्रिय साझा चेतना अभियानको थालनी गर्ने र नेपाललाई भ्रष्टाचारको जालोबाट उन्मुक्ति दिने ।’