नेपाली कांग्रेसका नेता डा. शेखर कोइरालाले वर्तमान निर्वाचन पद्धतिले विकृति बढाएको बताएका छन् ।

काठमाडौंमा प्रजातान्त्रिक विचार समाजको २५औं साधारण सभालाई सम्बोधन गर्दै कोइरालाले अहिलेको निर्वाचन पद्धतिले विकृति बढाएकाले यसलाई परिवर्तन गरेर समानुपातिक प्रणालीलाई हटाउनुपर्ने बताए ।

आगामी दिनमा हुने जुनसुकै निर्वाचनमा कांग्रेस पार्टी एक्लै जानुपर्ने उनको भनाइ थियो । ‘पार्टी यतिबेला अत्यन्तै अप्ठ्यारोमा छ, आगामी दिनमा पार्टी हरेक पाइलामा एक्लै उभिन सक्नुपर्छ’ उनले भने ।

पछिल्ला दिनहरूमा राजनीतिक दल र नेताहरूप्रति आम जनताको धारणा नकारात्मक रहेकोले नेताहरू सुध्रिने समय आएको उनले बताए ।

सभालाई सम्बोधन गर्दै कोइरालाले नक्कली भुटानी शरणार्थी प्रकरणका दोषीहरूलाई कुनै बहानामा चोख्याउने काम गर्न नहुने बताए । ‘जुनसुकै दल वा जुन तहका व्यक्ति भए पनि कानून बमोजिम कारवाही हुनैपर्छ’ कोइरालाले भने।