नेपाल हज समितिका अध्यक्ष शमशेर मियाँले पक्राउ पर्ने डरले भारतको गोरखपुरस्थित एक खोलामा मोबाइल फालेको बयान दिएका छन् ।

नक्कली शरणार्थी प्रकरणमा पक्राउ परेका मियाँले जिल्ला सरकारी वकिल कार्यालयमा बयानको क्रममा आफूले मोबाइल फालेको बताएका हुन् । 

‘शरणार्थी प्रकरणमा आफ्नो नामसमेत जोडिएपछि प्रहरीले पक्राउ गर्न सक्छ भन्ने सोची मैले बोक्ने गरेको एप्पल कम्पनीको आइफोन मोबाइल खोलामा फ्याँकी दिएको हुँ’ उनले बयानका क्रममा भनेका छन् । 

उनले ९८५७०२५ ६९९ नम्बरको सिम उक्त मोबाइलबाट झिकेर खोलामा फ्याँकेको बयान दिएका छन् । हाल एमआई कम्पनीको अर्को मोबाइलमा उक्त सिम राखेर चलाउँदै आएको उनले बताएका छन् । २०७६ पुष महिनादेखि उनी हज समितिको अध्यक्ष पदमा कार्यरत छन् ।

अध्यक्षको हैसियतमा उनले पाएको सरकारी गाडी ती गिरोहका सदस्यहरूलाई दिएको उनले स्वीकार गरेका छन् ।