सांसदलाई ल्यापटप दिने निर्णयबाट पछि हट्यो प्रदेशसभा सचिवालय

कोशी प्रदेशका प्रदेशसभा सदस्यलाई ल्यापटप वितरण गर्ने निर्णयबाट संसद् सचिवालय ‘ब्याक’ भएको छ ।

सांसदहरूले ल्यापटप नलिने घोषणा गरेपछि संसद् सचिवालयले टेन्डर प्रक्रिया रद्द गरेको संसद् सचिवालयका सूचना अधिकारी निरोज ढकालले जानकारी दिए ।

नेकपा एमाले र नेपाली कांग्रेसका सांसदले ल्यापटप नलिने घोषणा गरेका थिए । २ वटै दलले संसदीय दलको बैठक बसेर सांसदका लागि ल्यापटप खरिद गर्ने बजेट अन्यत्र खर्च गर्न आग्रह गर्दै ल्यापटप नलिने घोषणा गरेका थिए । 

आर्थिक मामिला तथा योजना मन्त्रालय समेत आफैंसँग राखेका मुख्यमन्त्री हिकमतकुमार कार्कीले डेढ करोड रुपैयाँ रकमान्तर गरेर ल्यापटप खरिद गर्नका लागि संसद् सचिवालयलाई बजेट दिएका थिए । 

९३ सांसद र ७ वटा संसदीय समितिका सचिवलाई ल्यापटप वितरण गर्ने गरी खरिद प्रक्रिया सचिवालयले अगाडि बढाएको थियो ।