उपप्रधानमन्त्री तथा गृहमन्त्री नारायणकाजी श्रेष्ठले वर्षायाममा हुने विपद् व्यवस्थापनका लागि तयारी अवस्थामा रहन सुरक्षा निकायलाई निर्देशन दिएका छन् ।

बिहीवार कुरिनटार चितवनस्थित सशस्त्र प्रहरी बल नेपाल विपद् व्यवस्थापन तालिम शिक्षालयमा गोताखोर तालिमको समापन कार्यक्रमलाई सम्बोधन गर्दै गृहमन्त्री श्रेष्ठले विपद् व्यवस्थापनका लागि तयारी अवस्थामा रहन निर्देशन दिए ।

उनले वर्षायाममा बाढी, पहिरो र डुबानका समस्याहरू आउने भन्दै यसको व्यवस्थापनका लागि जुट्नुपर्ने बताए । उनले सशस्त्र प्रहरी बललाई विपद् व्यवथापनका लागि तयारी अवस्थामा रहन आग्रह गरे । उनले विपद् व्यवस्थापनका लागि सर्वप्रथम मनको तयारी र संकल्पको आवश्यकता रहेको बताए ।

गृहमन्त्री श्रेष्ठले संगठनले दिएको जिम्मेवारी पूरा गर्दै सशस्त्रले विपद्को बेलामा जनताको सेवा गर्ने विश्वास व्यक्त गरे ।

उनले भने, ‘वर्षाको सिजन शुरू हुन लागेको छ । बाढी, पहिरो, डुबानका समस्याहरू देखापर्न सक्छन् । सडकहरूमा पहिरो जाने, बाटो अवरुद्ध हुने, दुर्घटना हुने खतरा बढ्न सक्छ । त्यस्तो स्थितिमा भर्खरै मात्र पनि हामीले केन्द्रीय विपद् समितिको बैठक बसेर आवश्यक तयारीका काम अगाडि बढाएका छौं । त्यसको निम्ति दोस्रो बैठक तत्काल बसेर केही योजनाहरूलाई व्यवस्थित ढंगले तयारी गर्ने निर्णय पनि लिएका छौं । त्यसैगरी यस अवस्थामा आफूहरूलाई पनि तयार गर्न सुरक्षा निकायका ती सबै अफिसर र जवानहरू, जसले हरेक आपत्विपद् पर्दाखेरी जनतालाई सेवा गर्दै आइराखेका छन्, उनीहरूले पनि आफूलाई त्यही ढंगले तयारी गर्नुपर्ने आवश्यकता छ । पहिला तपाईंहरूको सीपभन्दा मनको तयारी आवश्यकता छ । तपाईंहरूले आफूलाई संकल्प गर्नुपर्ने आवश्यकता छ । हामीलाई हाम्रो संगठनले विशेष जिम्मेवारी दिएको छ । विशेष जिम्मेवारी विपद् पर्दाखेरी जनतालाई राहत पुर्‍याउने विशेष जिम्मेवारी दिएको छ । त्यो जिम्मेवारीबोध गर्दै आफ्नो सीपको अधिकतम प्रयोग गरेर तपाईंहरूले जनतालाई विपद् पर्दाखेरी सेवा गर्नुहुनेछ । त्यसको निम्ति आफूलाई तयार पार्ने संकल्पका साथ तपाईंहरू प्रस्तुत हुनुभएको छ । त्यो निश्चय नै सराहनीय छ ।’

उनले सशस्त्र प्रहरीले विगतमा विपद्को समयमा गरेको राहत र उद्धारको काम उदाहरणीय र प्रशंसनीय रहेको पनि बताए । उनले समयमै विपद् व्यवस्थापनका लागि आवश्यक तयारी गरेमा विपद्को जोखिम कम हुने भन्दै तयारीमा रहन आग्रह गरेका छन् ।