नम्रता श्रेष्ठको शीर्ष भूमिका रहने फिल्म ‘ह्यासट्याग माया’ (#माया)को छायांकन बर्दियाबाट सुरु भएको छ । लुम्बिनी प्रदेशको बर्दिया राष्ट्रिय निकुञ्जमा पहिलो दिन केही दृश्यलाई खिच्दै फिल्मको छायांकन सुरु गरिएको हो । 

थ्रिलर विधामा निर्माण हुने फिल्मको बर्दिया सेड्युल चौध दिनको तय गरिएको छ । फिल्मको छायांकन बर्दियाकै आसपासमा गरिने कार्यकारी निर्माता अनुप पौडेलले जानकारी दिए । 

‘नेपालको सुन्दरतालाई पर्दामा ल्याउने कोसिस हाम्रो रहनेछ । यसका साथै बर्दियाको सेटअप पात्रलाई सुहाउँदो पनि छ । यहाँ दुई साता छायांकन गर्ने सेड्युल तय गरेका छौँ’, पौडेलले भने । यसै फिल्ममार्फत निर्देशनमा डेब्यु गरेका निर्देशक राजीव गुरुङले पहिलो दिनको काम राम्रो भएको जानकारी दिए । 

‘हामीले तय गरेको सेड्युल अनुसार नै काम भइरहेको छ । थ्रिलरमा मनोरञ्जन फिल्म तयार हुनेछ । हामी प्रस्तुतिसँगै अन्य विषयमा ध्यान दिइरहेका छौँ’, निर्देशक गुरुङले भने । फिल्ममा नम्रतासँगै सारूक ताम्राकार, रोय श्रेष्ठ, निकिता आचार्य, केनिपा सिंह, सुदाम सिके लगायतको अभिनय रहनेछ । यसको छायांकन काठमाडौंमा २० दिन र धरानमा ५ दिन समेत गरिनेछ । 

शर्मिला थापाको निर्माण रहेको फिल्मको कथा मायामै केन्द्रित छ । यसमा शीर्ष भूमिका निर्वाह गरेकी अभिनेत्री श्रेष्ठले एरियल योगा प्रशिक्षकको चरित्र निर्वाह गर्न प्रशिक्षणसमेत लिएकी थिइन् । नेपाली कलाकारमा चरित्र निर्माणका लागि यत्तिको मेहनत गर्नेको संख्या निकै कम छ । 

‘चरित्रलाई जीवन्त बनाउन समय दिएकी हुँ । पर्दामा देखिँदा फिक्का नदेखियोस् भन्ने मेरो प्रयास हरेक फिल्ममा रहन्छ । यो फिल्मलाई लिएर निकै उत्साहित छु । केही नयाँ गर्ने प्रयास गर्दैछौँ’, अभिनेत्री श्रेष्ठले भनिन् । 

रे भेन्चर्स प्राइभेट लिमिटेडको ब्यानरमा निर्माण भइरहेको फिल्ममा निर्देशक गुरुङ र आशुतोष श्रेष्ठको लेखन, उज्वल जोशीको छायांकन निर्देशन, रेलिजा श्रेष्ठको कला निर्देशन, कृति जोशीको श्रृंगार रहेको छ । 

यसमा कार्यकारी निर्मातामा अनुप पौडेल, कास्टिङ निर्देशकमा अर्जुन न्यौपाने, प्रोडक्सन म्यानेजरमा अरुण रेग्मी र दीलिप पन्त रहेका छन् ।