स्वर्गद्वारी दर्शन गरेर फर्किंदै गरेको कार सोमवार प्युठानमा दुर्घटनामा परेर मृत्यु भएका ८ जनामध्ये ७ जनाको पहिचान खुलेको छ ।

प्युठानको स्वर्गद्वारी नगरपालिका–४ भिगृमा लु१च ६३४५ नम्बरको कार दुर्घटनामा परेर मृत्यु भएका १ जनाको पहिचान खुल्न बाँकी छ ।

कारमा सवार २ महिला, २ पुरुष र ४ बालबालिका गरी ८ जना सबैको मृत्यु भएको छ । 

मृत्यु हुनेमा कार चालक दाङको लमही नगरपालिका–५ का ४९ वर्षीय तारा कुमाल, लमही नगरपालिका–७ गढवा बस्ने ४० वर्षीय गोविन्द शाह, सोही ठाउँकै शाहकी पत्नी राधा नेपाली, उनका छोरा ९ वर्षका आदित्य शाह छन् । 

तुलसीपुर उपमहानगरपालिका–१५ का ३५ वर्षीय सरिता शर्मा, सरिताका छोरा १४ वर्षीय विशाल पोखरेल र ९ वर्षीय विकास पोख्रेल रहेका छन् । मृतक ८ जनाको शव जिल्ला अस्पताल प्युठानमा राखिएको जिल्ला प्रहरी कार्यालय प्युठानका प्रवक्ता सुशील थापाले जानकारी दिए ।

मृतकका आफन्तहरू आएपछि शव बुझाइने थापाले बताए । दुर्घटना दिउँसो साढे ३ बजे भएको थियो । दुर्घटनाको कारण खुल्न बाँकी छ ।