अभिनेत्री केकी अधिकारीले फिल्म निर्माण गर्दा मानसिक स्वास्थ्य परामर्शको विभाग राख्न जरुरी भइसकेको बताएकी छिन् । 

उदीयमान अभिनेता सारुक ताम्राकार घरमै झुण्डिएको अवस्थामा भेटिएपछि यतिबेला नेपाली फिल्म क्षेत्र शोकमा छ । उक्त घटनापछि नेपाली फिल्म क्षेत्रमा मानसिक स्वास्थ्यको बहस समेत सुरु हुन थालेको छ। 

अभिनेत्री केकीले उक्त घटनापछि सामाजिक सञ्जालमा स्टाटस लेख्दै मानसिक स्वास्थ्यका सन्दर्भमा सुझावसहितको विचार राखेकी हुन् । 

उनले सार्वजनिक स्पटलाइटमा हुनुको लागत अकल्पनीय हुन सक्ने र यसबारे बेलैमा गम्भीर हुनुपर्ने बताएकी छन् ।

‘हामीले चलचित्र निर्माताहरू र मिडिया उद्योगका प्रतिनिधिहरूको रूपमा हाम्रो बजेट योजना बनाउँदा वा चलचित्र हस्ताक्षर गर्दा, निर्माणको समयमा सम्पूर्ण कलाकार तथा प्राविधिक सदस्यहरूका लागि मानसिक स्वास्थ्य परामर्शको विभाग पनि राखिन जरुरी भइसकेको छ’ उनले लेखेकी छिन् ‘सार्वजनिक स्पटलाइटमा हुनुको लागत अकल्पनीय हुन सक्छ, बेलैमा सबै मिली यसलाई गम्भीरताका साथ लिऔं ।’ 

केकीको उक्त स्टाटसमाथि धेरैले समर्थन जनाइरहेका छन् । अभिनेत्री करिश्मा मानन्धरले मानसिक स्वास्थ्यलाई सामान्य रुपमा लिन नमिल्ने प्रतिक्रिया जनाएकी छन्।