रेडी ट्रेड प्रालिको गोदामबाट बरामद भएको  ६६ कार्टुन ब्रेक प्याडभित्र राखिएको सामान सुन नभएर फलाम रहेको पुष्टि भएको छ ।

 राजश्व अनुसन्धान विभागले रेडी ट्रेडको गोदाममा छापा मारी सुन गाल्ने र जोख्ने उपकरण सहित ६६ कार्टुन खोलिएको अवस्थामा ब्रेकप्याड बरामद गरेको थियो । 

सोही ब्रेक प्याडभित्र कुन धातु प्रयोग गरिएको हो भन्ने परीक्षणका लागि राजश्व अनुसन्धान विभागले भन्सार विभागलाई परीक्षण गर्नका लागि स्याम्पल पठाएको थियो । 'उक्त स्याम्पल परीक्षणको परिणाम आइसकेको छ ।

भन्सार विभागले पठाएको ल्याब परीक्षण प्रतिवेदनमा ब्रेक प्याडभित्र सुन नभएर फलाम रहेको भनेर पुष्टि गरेको छ,'राजश्व अनुसन्धान विभागका उच्च स्रोतले लोकान्तरसँग शुक्रवार भन्यो, 'हामीलाई त्यसमा सुन भएको हुनसक्ने आशङ्का थियो । तर भन्सार विभागले त्यसमा सुन नभएर फलाम वा त्यस्तै अन्य धातु हुनसक्ने भनेर परीक्षण प्रतिवेदन पठाएको छ ।'

एउटा कार्टुनभित्र १० प्याकेट ब्रेक प्याड थियो । एउटा प्याकेटमा २ सेट ब्रेक प्याड थियो । केही दिनअघि राजश्वले  रेडी ट्रेड प्रालिको गोदाममा छापा हानेर ६६ कार्टुन ब्रेक प्याड बरामद गरेको थियो । 

विभागले अहिले अनुसन्धान सुनको मालिक को हो भन्नेतर्फ केन्द्रित गरेको छ । तर त्यसमा हालसम्म ठोस उपलव्धि प्राप्त गर्न सकेको छैन ।

 पक्राउ परेकाहरूसँग बयान लिने कार्य जारी नै रहेको हुनाले अहिले नै केही भन्न नसकिने राजश्व अनुसन्धान विभागका सूचना अधिकारी नवराज अधिकारीले बताए ।

'पाँच जना अनुसन्धान अधिकृतहरूले सुन तस्करीको विषयमा अहिले अनुसन्धान गरिरहनु भएको छ । अहिले अनुसन्धानको क्रम जारी नै रहेकाले त्यस विषयमा केही भन्न सकिँदैन,' अधिकारीले लोकान्तरसँग भने ।

राजश्व स्रोतका अनुसार पक्राउ परेका चिनियाँ नागरिकसँग दोभासे राखेर शुक्रवार बयान लिइएको छ । 'अहिले सम्मको बयानमा आफूलाई केही पनि थाहा नभएको नै चिनियाँ नागरिकले भनिरहेका छन्,' राजश्व स्रोतले लोकान्तरसँग भन्यो,'यद्यपि चिनियाँ नागरिकको मोबाइलको फोनको कल डिटेल्सलाई पनि हामीले सूक्ष्म तरिकाले अनुसन्धान गरिरहेकाले त्यसबाट केही थप जानकारी आउन सक्ने आस गरेका छौँ ।'

पक्राउ परेका १७ जनाकै कल डिटेल्स पत्ता लगाउनका लागि राजश्वले अदालतबाट अनुमति लिएर त्यसतर्फ अनुसन्धान केन्द्रित गरेको छ । नेपाल दूरसञ्चार प्राधिकरण र एनसेललाई समेत विभागले पत्राचार गरिसकेको उक्त स्रोतले बतायो ।

'चिनियाँ नागरिकसहित पक्राउ परेकाहरूले इन्कारी बयान गरे पनि केही न केही तथ्य फेला परेको छ,' विभाग स्रोतले लोकान्तरसँग भने,'त्यसै आधारमा थप अनुसन्धान अगाडि बढेको छ ।'

नेपाल राष्ट्र बैंकको टक्सार विभागमा पठाइएको यसअघिको सुनको नाप तौल लिनका लागि पनि अब विभागले लेखेर पठाउने तयारी भएको उनले खुलाए । 'रेडी ट्रेड प्रालिको गोदामबाट बरामद भएको ब्रेक प्याडको अवस्था जानकारी नभएकोले बरामद  भएको सुन जोख्न विभागले पत्राचार गरेको थिएन,' उक्त स्रोतले लोकान्तरसँग भन्यो । 

तर, अब भन्सार विभागबाट पनि परीक्षण प्रतिवेदन आइसकेको हुनाले टक्सार विभागलाई पनि बरामद भएको सुनको तौल लिन विभागले पत्राचार गर्ने उनले खुलाए ।

हङ्कङ्बाट  त्रिभुवन अन्तर्राष्ट्रिय विमानस्थलबाट भन्सार जाँच पास गरी ट्याक्सीमा लगिरहेको अवस्थामा सिनामंगलबाट  राजश्व अनुसन्धान विभागले अन्डर कभर अप्रेसन सञ्चालन गरी झन्डै १ क्विन्टल सुन तस्करी गरिएको अवस्थामा बरामद गरेको थियो ।