निवासमा महिलासँग अमर्यादित हर्कत गरेका प्रमुख प्रशासकीय अधिकृतमाथि मन्त्रालयको ‘एक्सन’

सरकारी क्वार्टरमा महिलासँग अमर्यादित हर्कत गरेका झापाको दमक नगरपालिकाका प्रमुख प्रशासकीय अधिकृत डमरुप्रसाद निरौलालाई संघीय मामिला तथा सामान्य प्रशासन मन्त्रालयले सोधपुछका लागि बोलाएको छ ।

संघीय मामिला तथा सामान्य प्रशासन मन्त्रालयका प्रवक्ता कमल भट्टराईका अनुसार केही बुझ्नुपर्ने भएकाले निरौलालाई मन्त्रालय बोलाइएको हो ।

‘उहाँको विषयमा आएका कुराहरूबारे बुझ्नका लागि मन्त्रालयमा बोलाएका हौं,’ उनले लोकान्तरसँग भने, ‘उहाँ मन्त्रालयमा आज उपस्थित भइसक्नुभएको छ ।’

अमर्यादित हर्कत गरिएका महिलाको टिकटक लाइभमा प्रमुख प्रशासकीय अधिकृत निरौलाले महिलालाई चुम्बन गरेको दृश्य देखिएको थियो । सरकारी क्वार्टरमा रातिको समयमा मदिरा सेवन गरी दुवै जनाले अमर्यादित हर्कत गरेका थिए ।