नेपाली कांग्रेसका नेता भरतकुमार शाह आफ्नै गृहक्षेत्रमा कार्यकर्ताबाट अपमानित हुनुपरेको छ ।

पार्टी सभापति शेरबहादुर देउवाका विश्वासपात्र उनी रुपन्देहीको क्षेत्र नम्बर ५ मा आन्तरिक विशेष अभियानअन्तर्गत आयोजित कार्यक्रममा अपमानित मात्र भएनन्, उनीमाथि हातपात हुने अवस्था सिर्जना भयो ।

शाहले बोल्ने क्रममा कांग्रेसका महासमिति सदस्य रहेका फखरुद्दीन खानप्रति लक्षित गर्दै ‘तपाईं जस्ता मान्छे कांग्रेसमा धेरै आए’ भनेपछि मञ्चमै रहेका खानले उठेर प्रतिवाद गरेका थिए । शाह सार्वजनिक लेखा समितिका पूर्व सभापति तथा अर्थ राज्यमन्त्री समेत हुन् । 

कार्यक्रममा सहभागी एक कांग्रेस कार्यकर्ताका अनुसार कार्यक्रममा नेताहरूबीच गुट परिवर्तनले असन्तुष्टि बढेको कुरा छताछुल्ल भएको थियो । कार्यक्रममा खानले बोलिसकेपछि बोलेका शाहले खानप्रति लक्षित गर्दै ‘नेपाली कांग्रेस बुझ्न समय लाग्छ, नेपाली कांग्रेस त्यतिकै बुझिँदैन, तपाईं जस्ता मान्छे धेरै आइसके, मसिना बाबा हुनुहुन्थ्यो, जोतेन्द्र मोहन चौधरी हुनुहुन्थ्यो, छविलाल भुसाल हुनुहुन्थ्यो, उनीहरू कहाँ गए ? रामनारायण यादव यही हुनुहुन्छ, उहाँ पनि त २०४८ सालबाट कांग्रेसमा हुनुहुन्छ’ भनेपछि खानले उठेर शाहलाई थर्काएको भिडियोमा देखिएको छ ।

फखरुद्दीन खान सहितका युवाहरूले गुट बदलेर शाहको साथ छाडेपछि खानसँग रिसाएर सार्वजनिक कार्यक्रममै कांग्रेस नबुझेको आरोप लगाएका कारण त्यस्तो अवस्था सिर्जना भएको एक नेताले बताए । चुनावमा असहयोग गरेका केही नेताहरूलाई कारवाही भएपछि कार्यक्रममा विवादको अवस्था सिर्जना भएको बताइएको छ । उनले सार्वजनिक कार्यक्रममा खानले देखाएको रवाफले आफैंलाई कमजोर बनाउने शाहले लोकान्तरलाई जानकारी दिए ।

शाह प्रतिनिधिसभा र खान सोही क्षेत्रबाट प्रदेश सभामा उम्मेदवार थिए । दुवै नेता पराजित भएपछि असन्तुष्टि तीव्र भएको थियो । कांग्रेस नेता तथा पूर्व गृहमन्त्री बालकृष्ण खाँण नक्कली भुटानी शरणार्थी प्रकरणमा जेल परेपछि कांग्रेस रुपन्देहीमा संस्थापन पक्ष कमजोर हुँदै गएको छ ।