अभिनेत्री नम्रता श्रेष्ठले सारुक ताम्राकार आत्महत्या प्रकरणबारे पहिलो पटक बोलेकी छन् । नम्रताले सोमबार आफ्नो सामाजिक सञ्जाल फेसबुकमा ‘केही वास्तविक सूचना प्रवाह गर्दैछु’ भन्दै लामो स्टाटस लेखेकी छन् । 

उनले मिडिया तथा सामाजिक सञ्जालबाट आफूमाथि आक्रमण भएको गुनासो गर्दै आफ्नो मौनतालाई कमजोरी नठान्न आग्रह गरेकी छन् । 

सारुक सम्भावना बोकेका र सहयोगी भावना भएको कलाकार भएको बताउँदै उनको आत्महत्याले आफूलाई अचम्मित तुल्याएको पनि बताएकी छन् । 

घटना केही समय अघि घटेको भएपनि अहिले सामाजिक सञ्जालमार्फत यसबारे बोल्न बाध्य भएको बताएकी छन् । ‘एक जना महिला भएकै कारण यति धेरै सामाजिक  आक्रमण भएको होला सायद । किनकी यो पुरुष प्रधान समाज हो ठीकै छ ।  मेरो मौनता लाइ कमजोरी नठान्न अपिल गर्दछु’ नम्रताले लेखेकी छन् ‘म एक महिला मात्र नभएर कलाकार पनि हो अनि नेपाली नागरिक । हरेक नेपाली नागरिकको बाच्न पाउने नैसर्गिक अधिकार हुन्छ । सायद यो देशमा कानुन मरेको छैन । यो कानुनी राज्य हो । झुटको खेती गर्नुहुने सबै दिग्गज महानुभावहरुलाई सत्यको बाटो हिड्ँनको लागी आग्रह गर्दछु ।’ 

उनले घटनापछि आफूलाई धेरै मिडियाबाट फोन आएको बताउँदै आफ्नो फोन परिवारका सदस्यसँग हुने उल्लेख गरेकी छन् । मिडियामा बोल्दा अनुसन्धानमा असर पर्छ भनेर परिवारले यसबारे बोल्न अनुमति नदिएको पनि नम्रताले उल्लेख गरेकी छन् । 

चलचित्र निर्माण टिम र मृतकका परिवारसँग आफ्नो परिवारका सदस्यहरू र सहयोगीले सुरुका दिनहरुबाट पटक पटक सम्पर्क गर्न खोज्दा सम्पर्कमा आउन नचाएको समेत नम्रताले उल्लेख गरेकी छन् । 

‘...जब मलाई प्रहरी प्रशासनबाट बोलावट भयो म तुरुन्त प्रहरी कार्यालयमा हाजिर भएर यो घटनासम्बन्धी डिटेल बताएँ । सो चलचित्रको मेकिङ टिम, कलाकारहरू सबै जनासँग सोधपुछ भइरहेको जस्तो लाग्छ । किनकी सो चलचित्रको कलाकार म मात्र थिइन्’  नम्रताले लेखेकी छन् ‘नेपाल प्रहरी विश्वकै टप अनुसन्धानमा अब्बल प्रहरी हो भन्ने भनाइ छ । आशा छ यो घटनाको सत्य तथ्य पक्कै पनि दूधको दूध पानीको पानी हुने गरी अनुसन्धान गर्ने छ भन्नेमा हामी पूर्ण आशावादी छौँ ।’ 

उनले आफू र परिवारको तर्फबाट प्रहरी प्रशासनलाई घटनाको अनुसन्धानमा पूर्ण साथ रहने बताएकी छन् । 

चलचित्र ‘ह्यासट्याग माया’मा काम गरिरहेका सारुकले गत असार २१ गते आफ्नै घरमा आत्महत्या गरेका थिए ।