नक्कली शरणार्थी प्रकरणमा पुर्पक्षका लागि जेलमा रहेका कांग्रेस केन्द्रीय सदस्य एवं पूर्व गृहमन्त्री बालकृष्ण खाँणलाई भेट्न कांग्रेस नेताको लर्को लाग्न थालेको छ । प्रत्येक दिनजसो कांग्रेस नेताहरुले खाँणलाई भेटिरहेका छन् । 

परराष्ट्र मन्त्री एनपी साउद, उद्योग मन्त्री रमेश रिजाल लगायतका कांग्रेस नेताले खाँणलाई भेटिसकेका छन् । पछिल्लो पटक कांग्रेस नेता प्रकाशमान सिंह, कृष्ण सिटौला र डा. शशांक कोइरालाले खाँणलाई भेटेका हुन् । 

पूर्वमहामन्त्री समेत रहेका शशांकले बुधवार बिहान खाँणलाई भेटेका हुन् । भेटमा कोइरालाले खाँण निर्दोष रहेको बताएका थिए । ‘तपाईँ निर्दोष हुनुहुन्छ, तपाईँ छुट्नुपर्छ हामी पहल गर्छौँ’, कोइरालाको भनाइ उदृत गर्दै कांग्रेस नेता महेन्द्र यादवले लोकान्तरसँग भने । कोइरालाले यस्तो आश्वासन दिँदा खाँण भावुक बनेका थिए । 

नेपाली नागरिकलाई नक्कली शरणार्थी बनाएर अमेरिका पठाउने धन्दामा संलग्नताको पुष्टि भएपछि काठमाडौँ जिल्ला अदालतको आदेशपछि खाँण असार १ गतेदेखि जेलमा छन् । कांग्रेस नेता खाँण, एमाले सचिव टोपबहादुर रायमाझी लगायत नेताहरू काठमाडौँ जिल्ला अदालतको आदेशविरुद्ध उच्च अदालत पाटन पुगेका छन् ।