तीजमा समेत अपराधः चिर्पटदेखि चक्कुसम्म प्रहार, ५ जनाको गयो ज्यान

तीज पर्वको बेला लुम्बिनी प्रदेशमा अपराधका घटना बढेका छन् । पाल्पा, रुपन्देही र कपिलवस्तुमा झडपदेखि हत्यासम्मका घटना भए । पाल्पाको तिनाउमा आइतवार राति एक युवाको हत्या भएको छ । तिनाउ गाउँपालिका–२ दोभान घोडेबासका २४ वर्षीय सुनिल खत्रीको चक्कु प्रहार गरी हत्या गरिएको जिल्ला प्रहरी कार्यालय पाल्पाका सूचना अधिकारी प्रहरी निरीक्षक सन्तोष चन्दले जानकारी दिए ।

स्थानीय एक घरमा भेला भएर तीज गीतमा नाच्नेक्रममा सामान्य झगडा हुँदा ती युवकमाथि धारिलो हतियार (चक्कु) प्रहार भएको थियो । गम्भीर घाइते खत्रीलाई उपचारका लागि बुटवलस्थित लुम्बिनी प्रादेशिक अस्पतालमा ल्याइएकोमा सोमवार बिहान पौने दुई बजे चिकित्सकले मृत घोषणा गरेका थिए । स्थानीय महिला नाचिरहेका बेला ती युवाहबीच सामान्य झगडा भएको थियो । सोही विषयलाई लिएर पुनः झगडा भएको प्रहरीले जनाएको छ । झगडाले उग्ररुप लिएपछि चक्कु प्रहार गरेर हत्या गरेको प्रारम्भिक अनुसन्धानमा खुलेको प्रहरी निरीक्षक चन्दले बताए । हत्याको आरोपमा ४ जना युवालाई प्रहरीले नियन्त्रणमा लिएको छ । घटनाबारे थप अनुसन्धान भइरहेको प्रहरीले जनाएको छ ।

त्यस्तै सोमवार रुपन्देहीको सैनामैनामा दुई पुरुष मृत अवस्थामा फेला परेका छन् ।  सैनामैना नगरपालिका–७ हरियाली टोलका ५० वर्षीय नाथु चौधरी र सोही स्थानका ५५ वर्षका पल्टु चौधरी मृत अवस्थामा फेला परेका हुन् । इलाका प्रहरी कार्यालय, सालझण्डीका प्रहरी निरीक्षक (इन्सपेक्टर) अनिल पण्डितका अनुसार उनीहरूको शव एउटा बाटो र अर्को खेतमा फेला परेका थियो । 

‘प्रारम्भिक अनुसन्धानमा उनीहरूले मदिरा सेवन गरेको देखिन्छ,’ इन्सपेक्टर पण्डितले भने, ‘बिहान दुवैजना घरबाट सँगै निस्किएको बुझिएको छ । चौधरीद्वयको एकैसाथ कसरी मृत्यु भयो त्यो अनुसन्धानको विषय छ ।’ शवको पोष्टमार्टम गरी अनुसन्धान भइरहेको उनले बताए । मृतक दुवैजना मजदुर रहेको बताइएको छ ।

यसैगरी रूपन्देहीको तिलोत्तमामा मजदुरहरूबीच भएको झडपमा परी एकजनाको मृत्यु भएको छ भने तीन घाइते भएका छन् । प्रहरीका अनुसार सोमवार विश्वकर्मा पूजापछि रमझमका क्रममा झडप भएको हो । इलाका प्रहरी कार्यालय बुटवलका प्रमुख प्रहरी नायव उपरीक्षक (डीएसपी) दानबहादुर थापाका अनुसार तिलोत्तमा– ९ केवलानीमा भवन निर्माणसँग सम्बन्धित मजदुरहरू आपसमा मिलेर विश्वकर्मा पूजा गरेपछि रमाइलो गर्ने क्रममा झडप भएको प्रारम्भिक अनुसन्धानमा देखिएको छ ।

‘विश्वकर्मा पूजापछि मदिरा सेवन गरी नाचगानसहितको रमाइलो गरेको र सो क्रममा उनीहरूबीच झडप भएको देखिन्छ, तर घटना संवेदनशील रहेकाले यसलाई फराकिलो दायरा बनाउँदै गम्भीर अनुसन्धानमा प्रहरी जुटेको छ । थप अनुसन्धानपछि नै खुल्छ,’ उनले भने ।

झडपमा गम्भीर घाइते भएका हेटौंडा घर भई रुपन्देहीको मंगलापुरमा बस्दै आएका सुरेश स्याङ्तानको अस्पताल लैजाने क्रममा बाटोमा मृत्यु भएको प्रहरीले जनाएको छ । झडपमा परी काठमाडौं महानगरपालिका–१ बस्ने विकास वाइबा, गढी गाउँपालिका मकवानपुरका राजु तामाङ र सोही ठाउँका हस्तसिंह तामाङ घाइते भएका छन् ।

घाइतेहरूको भैरहवास्थित युनिभर्सल मेडिकल कलेजमा उपचार भइरहेको छ । झडपमा संलग्न भएको आशंकामा १३ जनालाई प्रहरीले नियन्त्रणमा लिएको छ । डीएसपी थापाले घटनाको अनुसन्धान भइरहेको बताएका छन् ।

यस्तैगरी कपिलबस्तुमा चिर्पट प्रहार गरी बुबाको हत्या गरेको आरोपमा प्रहरीले छोरालाई पक्राउ गरेको छ । पक्राउ पर्नेमा कपिलवस्तु वाणागंगा नगरपालिका–८ पुलचोक बस्ने २६ वर्षीय विकास परियार हुन् । उनलाई सोमबार राति इलाका प्रहरी कार्यालय पिपराबाट खटिएको टोलीले पक्राउ गरेको हो ।

घरयासी विवादका क्रममा उनले ६० वर्षीय बुवा बलबहादुर परियारलाई चिर्पट प्रहार गरी घाइते बनाएका थिए । उपचारको क्रममा सामुदायिक अस्पतालमा मृत्यु भएपछि विकासलाई नियन्त्रणमा लिएको प्रहरीले जनाएको छ । यस घटनामा प्रहरीले थप अनुसन्धान गरिरहेको जनाएको छ ।