भारतको जोगबनी बजारमा यतिबेला तिहारका लागि किनमेल गर्नेको नेपाली उपभोक्ताको भीड बढेको छ । दशैंदेखि शुरू भएको  नेपालको सीमावर्ती बजारको भीड तत्कालै रोकिने छाँट देखिँदैन । प्रायः छठसम्म नै जोगबनीमा नेपाली उपभोक्ताको भीड हुने गरेको छ । 

विराटनगर, इटहरी र धरानमा भन्दा जोगबनीमा लुगाफाटा तथा खाद्यान्न सस्तो पर्ने भएकाले नेपाली उपभोक्ता त्यहाँ जाने गरेका छन् । त्यसो त व्यापारीको गन्तव्य पनि जोगबनीले हुने गरेको छ । विशेषगरी चिनी सस्तो पाइने लोभमा उनीहरूको गन्तव्य सीमापारि हुने गरेको हो ।

अधिकांश उपभोक्ता जोगबनी जाने हुँदा यसको मारमा नेपाली व्यापारी परेका छन् । यसले गर्दा दशैँ, तिहार, छठजस्ता ठूला चाडपर्वमा औद्योगिक नगरी विराटनगरको व्यापारमा मन्दी आउने गरेको छ । 

चाडपर्व लक्षित घरायसी किनमेलका लागि सीमा नाकामा खासै अवरोध हुँदैन । सामान्य चेकजाँच मात्रै हुने गरेको छ । यसले गर्दा सस्तो सामानको खोजीमा मोरङ, सुनसरी, झापा र धनकुटासम्मका नेपाली उपभोक्ता सीमावर्ती बजार जोगबनी पुग्ने गरेका छन् । ‘चाडपर्व लक्षित किनमेलमा दुई पैसा जोगाउन विराटनगर, रंगेली, बेलबारी, उर्लाबारी, दुहबी, इटहरी, धरान, धनकुटा र दमकसम्मका नेपाली उपभोक्ताले भारतको बजारमा आएर सामग्री लाने गरेका छन्,’ सफारी चालक अनिल साहले भने ।

विराटनगरमा ऐतिहासिक रथ यात्रा हुने गरेको छ । रथ तान्नका लागि १० हजारभन्दा बढी मानिस यहाँ आउने गरेका छन् । तर चाडपर्वको बेला देनिक १० हजारभन्दा बढी मानिस जोगबनी जाने गरेको नाकामा खटिएका सुरक्षाकर्मीहरू बताउँछन् ।

त्यसो त सरकारले प्रमुख चाडबाडलाई लक्षित गरेर सुपथ मूल्य पसल सञ्चालनमा ल्याएको छ । विराटनगरको साल्ट ट्रेडिङ कर्पाेरेसन र खाद्य व्यवस्था तथा व्यापार कम्पनीले असोज २१ गतेबाट नुन र स्टिम जिरा मसिनो चामलको बिक्री गरिरहेको छ । सुपथ मूल्य पसलमार्फत २० रुपैयाँ प्रतिकेजीको नुन १८ रुपैयाँ र ८३ रुपैयाँ प्रतिकेजीको चामल ७६ रुपैयाँमा बिक्री वितरण गरिरहेका छन् । सहुलियत दरमा ७ रुपैयाँ छुटसहित प्रतिव्यक्ति २५ किलोसम्म चामल बिक्री वितरण गर्ने गरिएको खाद्य व्यवस्थाले जनाएको छ ।

सुपथ मूल्य पसलबाट बिक्री हुने अन्य खाद्यान्नमा समेत सरकारले पछिल्लो समय कटौती गर्दै आएको छ । विगत २ वर्षयता सोना मन्सुली र बासमती चामल प्राप्त हुनै छोडेको खाद्य व्यवस्था तथा व्यापार कम्पनीले जनाएको छ ।

उपभोक्ताले रुचाउन छोडेपछि विगत २ वर्षदेखि साल्ट ट्रेडिङले पनि नुनमात्र बिक्री गरिरहेको छ । यसअघिका चाडपर्वमा चिनी पनि बिक्री वितरण गर्दै आएको थियो । तर अहिले त्यहाँ चिनी पाइँदैन । उपभोक्ताले किन्नै छोडेपछि सरकारले पठाउन बन्द गरेको । साल्ट ट्रेडिङले जनाएको छ ।

यसले गर्दा पनि उपभोक्तासँगै व्यापारीहरू पनि चिनी किन्नका लागि सीमापारि जोगबनी जाने गरेको पाइएको छ ।

मोरङको बेलबारीका केदारमणि पौडेल चिनी किन्नका लागि ६० किलोमिटर दूरी पार गरेर जाेगबनी जाने गरेको बताउँछन् । ‘चिनी किन्न जोगबनी  जानैपर्छ । यसैबेला खाद्यान्न र लताकपडा पनि लिएर आउँछु,’ उनले भने ।

अर्की उपभोक्ता दुर्गा नेपालले पनि आफू चिनी किन्नकै लागि इटहरीबाट जोगबनीसम्म आएको बताइन् । सबै उपभोक्ता जोगबनी जाँदा विराटनगर भने सुनसान हुने गरेको व्यापारीको गुनासो छ ।