भारतसँग सिमाना जोडिएका पूर्वी नाकामा अझै केही दिन सुरक्षा जाँचमा कडाइ गरिने भएको छ । भारतसँग जोडिएका चार जिल्लाका नाकाहरूमा अझै केही दिन सुरक्षा जाँचमा कडाइ गरिने भएको हो ।

नेपालमा धर्मको नाममा आन्दोलन र प्रदर्शन भइरहेको बेला भारततर्फबाट पनि घुसपैठ हुनसक्ने आशंका गरेर सुरक्षा निकायले विशेष निगरानी र गस्ती बढाएको हो । भारतबाट अवैध घुसपैठको आशङ्कामा सरकारले केही दिनदेखि पूर्वी नाकामा कडाइ गरिरहेको छ । सीमावर्ती क्षेत्रमा प्रहरीले कुकुरसहित गस्तीलाई निरन्तरता दिएको छ भने जाँच कडा पारेको छ । 

सीमा नाकामा अझै केही दिन विशेष सुरक्षा सतर्कता कायम राखिने प्रदेश प्रहरी कार्यालयका प्रहरी नायब महानिरीक्षक राजेश बास्तोलाले बताए । ‘हामीले तीनदेखि झापा, मोरङ, सुनसरी र इलामका नाकाहरूमा कडाइ गरेका थियौं,’ बास्तोलाले भने, ‘अब परिस्थिति कस्तो हुन्छ थप सुरक्षा विश्लेषण गरेर अगाडि बढ्छौँ । तर, अझै तीन/चार दिन गस्ती र निगरानीमा विशेष ध्यान दिन्छौं ।’

काठमाडौंमा व्यवसायी दुर्गा प्रसाईँले मंसिर ७ गते प्रदर्शन गर्ने तयारी गरेसँगै सुरक्षा निकायले भारतीय नाकामा निगरानी र जाँच बढाएको थियो । सुरक्षा निकायले भारतबाट केही संख्यामा मानिसहरू आउनसक्ने आशंका गरेपछि नेपाल प्रवेश गर्नेहरूको परिचयपत्र, काम तथा अन्य विवरणबारे विशेष चासो दिएर जाँचलाई कडा पारिएको थियो । 

प्रसाईँले भारतबाटसमेत आफ्नो कार्यक्रम सहभागी हुन मानिसहरू आउने सञ्चारमाध्यमबाट सार्वजनिक गरेपछि सुरक्षा निकायले विशेष ध्यान दिएको थियो । 

मोरङको जोगवनी, झापाको काँकरभिट्टा, भद्रपुर, इलामको पशुपतिनगर र सुनसरी जिल्लाका विभिन्न नाकाहरूमा  प्रहरीले कडाइ गरिरहेको छ ।
 
प्रहरीका अनुसार भारतबाट नेपाल प्रवेश गर्नेहरूले परिचय देखाउनु पर्ने व्यवस्था लागू गरिएको छ । 

नाकामा वरिष्ठ सई र असईको नेतृत्वमा प्रहरी परिचालन गरिएको छ । धार्मिक सभाका लागि भन्दै नेपाल आउन खोज्नेहरूलाई प्रहरीले नाकाबाटै फर्काइरहेको छ ।