संघीय मामिला तथा सामान्य प्रशासन मन्त्री अनिता देवी माइतीघरबाट पक्राउ परेका नेता/कार्यकर्तासँगै धर्ना बस्न पुलिस क्लब भृकुटीमण्डप पुगेकी छन् ।

माइतीघरमा निषेधित क्षेत्र तोडेर धोती दिवस मनाउने क्रममा जनमत पार्टीका अध्यक्ष सीके राउतसहित ५१ जना पक्राउ परेपछि मन्त्री पनि उनीहरूको पछाडि लागेर पुलिस क्लबमा पुगेकी हुन् ।

राउतलगायत जनमतका नेता कार्यकर्तालाई सोमवार बिहान प्रहरीले माइतीघरबाट पक्राउ गरेको थियो ।

प्रदर्शनका लागि भनेर मन्त्री अनिता देवी पनि माइतीघर पुगेकी थिइन् । मन्त्रीलाई सशस्त्र प्रहरीले घेरा हालेर प्रदर्शनमा सहभागी हुन नदिएको उनका स्वकीय सचिव नवरत्न साहले लोकान्तरसँग बताए ।

'मन्त्रीज्यू पनि प्रदर्शनका लागि माइतीघर पुग्नुभएको थियो । उहाँलाई सशस्त्र प्रहरीले घेरा हालेर प्रदर्शनमा सहभागी हुन दिएन । पार्टी अध्यक्षसहित नेता/कार्यकर्ता पक्राउ परेपछि उहाँ पनि प्रहरी कार्यालयमा पुग्नुभएको हो,' साहले भने ।

काठमाडौं प्रहरी परिसरका प्रमुख एसएसपी भूपेन्द्र खत्रीले पनि मन्त्री साहलाई नियन्त्रणमा नलिइएको बताए ।

'मन्त्रीज्यू पक्राउ पर्नुभएको हैन, बिहान नियन्त्रणमा लिइएकालाई भेट्न जानुभएको हो,' एसएसपी खत्रीले लोकान्तरसँग भने ।

मन्त्री अनिता देवी अहिले पनि पुलिस क्लबमा पार्टी अध्यक्ष राउतसहितका नेता/कार्यकर्तासँगै धर्नामा बसेकी छन् । उनी सरकारमा जनमत पार्टीबाट प्रतिनिधित्व गर्ने एक मात्र मन्त्री हुन् ।