नेपालका लागि खेल सामाग्री उत्पादक संस्था योनेक्सको आधिकारिक बिक्रेता इनास इन्टरप्राइजेजको आयोजनामा दोस्रो योनेक्स सनराइज इनास सब-जुनियर च्यालेन्ज कप राष्ट्रिय ब्याडमिन्टन प्रतियोगिता २०८० सुरु भएको छ। 

योनेक्स सनराइज इनासको मुख्य प्रायोजन रहेको च्याम्पियनसिपमा यू-१५, यू-१३ र यू-११ छात्र तथा छात्रा गरी प्रतिस्पर्धा भइरहेको आयोजकले जनाएको छ। 

प्रतियोगिता बिहीबार देखि पुस २९ गते सम्म टोखास्थित दीपक ब्याडमिन्टन एकेडेमी (G4)को कभर्ड हलमा आयोजना भएको हो । 

च्याम्पियनसिपमा देशैभरीबाट १२७ खेलाडीको सहभागिता रहेको आयोजकले जनाएको छ। जसमा छात्रातर्फ भने ३५ जनाको सहभागिता रहेको छ। 

कोसी प्रदेशबाट सहभागी सङ्ख्या ६ जना रहेकोमा छात्रातर्फ १ जना, गण्डकी प्रदेशबाट १२ जना सहभागी रहेकोमा छात्रातर्फ १ जना, लुम्बिनी प्रदेशबाट ४ जना र  सुदूरपश्चिम प्रदेशबाट ५ जना छन् ।  त्यस्तै बागमती प्रदेशको काठमाडौँबाट ९४ जना खेलाडीको सहभागिता रहेको आयोजकले जनाएको छ। 

प्रतियोगितामा काठमाडौँका विभिन्न क्लब र स्कुलबाट खेलाडीले सहभागिता जनाएका छन् ।    

कार्यक्रमको उद्घाटन राष्ट्रिय खेलकुद परिषद् (राखेप) का सदस्य सचिव टंकलाल घिसिङ र आयोजक इनास इन्टरप्राइजेजका प्रमुख राजु बास्तोलाले ब्याडमिन्टन खेलेर सुरु गरेका थिए। 

कार्यक्रममा बोल्दै इनास इन्टरप्राइजेजका प्रमुख राजु बास्तोलाले ब्याडमिन्टन प्रतियोगिताको लागि एउटा राम्रो हल उपलब्ध गराइदिन सदस्य सचिव घिसिङलाई अनुरोध गरे। " ब्याडमिन्टन प्रतियोगिता आयोजनाको लागि आफ्नो एउटा हल हुने भए सबैको लागि सजिलो हुने थियो, " बास्तोलाले भने। 

त्यस्तै राष्ट्रिय खेलकुद परिषद् (राखेप) का सदस्य सचिव टंकलाल घिसिङले इटहरी र जुम्लामा उत्कृष्ट ब्याडमिन्टन हल बनेको र त्यहाँ अन्तर्राष्ट्रिय स्तर प्रतियोगिता आयोजना गर्न सकिने प्रस्ट पारे। " परिषद्को स्वामित्वमा रहेको इटहरीको हलमा बहु उपयोगी खेलको लागि उपयोगी छ। म जुम्लामा गए त्यहाँ पनि छ। त्यसैले सबै तिर हल छ। के छैन भने ब्याडमिन्टन खेललाई कसरी विकास गर्न सकिन्छ भन्ने तर्फ भने साथीहरूको ध्यान जना जरुरी छ," उनले भने। 

बिहीबार पहिलो चरणको खेलमा ६६ जनाको सहभागिता रहेको थियो भने ३३ जना दोस्रो चरणमा प्रवेश गर्न सफल भएका छन् । प्रतियोगिताको मिडिया पार्टनर लोकान्तर डटकम रहेको छ । 

तस्बिरहरु हेर्नुहोस्