‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
क्रिकेटर सन्दीप लामिछानेविरुद्ध बलात्कारको उजुरी दिएकी पीडित गौशाला– २६ (परिवर्तित नाम)ले आफ्ना तस्वीर सामाजिक सञ्जालमा हाल्नेविरुद्ध नेपाल प्रहरीको साइबर ब्युरोमा उजुरी दिएकी छिन् ।

उनले बिहीवार आफैँ उपस्थित भएर कारबाहीको माग गर्दै उजुरी दिएको ब्युरोका प्रहरी निरीक्षक राजकुमार खड्गीले जानकारी दिए ।
बलात्कार मुद्दामा लामिछाने दोषी ठहर भएर ८ वर्ष कैदको फैसला आएसँगै गौशाला २६ का तस्वीर नामसहित सामाजिक सञ्जालमा सार्वजनिक भएका थिए । यसो गर्नेहरूविरुद्ध कारबाहीको माग गर्दै पीडित प्रहरीकहाँ पुगेकी हुन् ।

यसैगरी सामाजिक सञ्जाल प्रयोगमा संवेदनशील नरहेको भन्दै रवि लामिछाने नेतृत्वको राष्ट्रिय स्वतन्त्र पार्टी (रास्वपा)ले प्रवासी नेपाली सम्पर्क विभाग जापान च्युबू शाखा समितिका सदस्य दिवस सापकोटालाई निलम्बन गरेको छ । उनले गौशाला २० को तस्बिर सार्वजनिक गरेको आरोप लागेको छ । 
००००
नेपाल क्रिकेट संघ क्यानले क्रिकेटर सन्दीप लामिछानेलाई निलम्बन गरेको छ । काठमाडौं जिल्ला अदालतले बलात्कार आरोपमा दोषी ठहर गर्दै ८ वर्षको जेल सजाय सुनाएपछि क्यानले उनलाई निलम्बन गरेको हो ।

क्यानको निलम्बनसँगै अब उनले घरेलु तथा अन्तर्राष्ट्रिय कुनै पनि क्रिकेट खेल्न पाउने छैनन् । यसअघि उनी आफैंले नेपाली राष्ट्रिय टोलीबाट अलग भएको घोषणा गरेका थिए । बलात्कार मुद्दामा दोषी ठहर भएसँगै शिखरमा पुगेको उनको क्रिकेट यात्रा तहसनहस भएको छ ।
००००
यौन हिंसादेखि व्यक्ति बेपत्ता बनाएको अभियोग लागेका रामबहादुर बम्जन पुर्पक्षका लागि कारागार चलान भएका छन् ।
सर्लाही जिल्ला अदालतका न्यायाधीश विष्णुप्रसाद रेग्मीको इजलासले बम्जनलाई थुनामा पठाउने आदेश दिएको श्रेस्तेदार सदन अधिकारीले जानकारी दिए ।
००००
राष्ट्रिय परीक्षा बोर्डले साविकको माध्यमिक शिक्षा परीक्षा, कक्षा १० (एसईई)लाई कायमै राख्न प्रतिनिधिसभाको शिक्षा स्वास्थ्य तथा सूचना प्रविधि समितिसमक्ष आग्रह गरेको छ ।

विद्यालय शिक्षा विधेयक, २०८० माथि सुझाव दिने क्रममा राष्ट्रिय परीक्षा बोर्डका अध्यक्ष डा महाश्रम शर्माले हाल सञ्चालन भइरहेको परीक्षालाई कायम राख्न र यसलाई प्रदेश सरकारबाट सञ्चालन गर्न सुझाव दिए ।
००००
यातायात व्यवस्था विभागका महानिर्देशक उद्धवप्रसाद रिजालसहितको टोली सवारी चालक अनुमति पत्रमा प्रयोग हुँदै आएको स्मार्ट कार्डको गुणस्तर अनुगमनका लागि भन्दै जर्मनी जान लागेका छन् ।

टोलीमा विभागका महानिर्देशक रिजाल, निर्देशक समेत रहेका आईटी शाखा प्रमुख मुकेश रेग्मी, लेखा अधिकृत यलप्रसाद रेग्मी, भौतिक पूर्वाधार तथा यातायात मन्त्रालयको कर्मचारी प्रशासन महाशाखा प्रमुख समेत रहेका सहसचिव रघुराम विष्ट र भौतिक पूर्वाधार तथा यातायात मन्त्री प्रकाश ज्वालाका स्वकीय सचिव रामहरि शर्मा छन् । सहसचिव विष्टले भिसा प्रक्रियामा रहेको बताए ।
००००
मुलुकबाट बाहिरने भन्दा भित्रने मुद्राको मात्रामा वृद्धि भएको पाइएको छ । नेपाल राष्ट्र बैंकले सार्वजनिक गरेको चालु आर्थिक वर्षको पाँच महिनामा शोधनान्तर स्थिति रू दुई खर्ब १० अर्ब ५९ करोडले बचतमा छ ।

अघिल्लो वर्षको सोही अवधिमा शोधनान्तर स्थिति रू ४५ अर्ब ८६ करोडले बचतमा थियो । अमेरिकी डलरमा अघिल्लो वर्षको सोही अवधिमा ३४ करोड ६८ लाखले बचतमा रहेको शोधनान्तर स्थिति समीक्षा अवधिमा एक अर्ब ५८ करोडले बचतमा  छ ।

यसैगरी  मुलुकभित्र विदेशी मुद्राको सञ्चिति सबल बन्दै गएको पाइएको छ । चालु आवको मङ्सिर मसान्तसम्म कूल रु १७ खर्ब ६७ अर्ब बराबरको विदेशी मुद्राको सञ्चिति रहेको हो । 

यसैगरी पाँच महिनामा ६ खर्ब १३ अर्ब २५ करोड रुपैयाँ बराबरको विप्रेषण (रेमिट्यान्स) स्वदेश भित्रिएको छ ।
००००
सरकारले भिजिट भिसामा विदेश प्रस्थानको विद्यमान अवस्थालाई पुनर्विचार गरी थप सहजीकरण र व्यवस्थित गर्ने भएको छ ।  
बिहीवार गृह मन्त्रालयमा उपप्रधानमन्त्री एवम् गृहमन्त्री नारायणकाजी श्रेष्ठसहितको बैठकले यस्तो निर्णय गरेको हो ।
००००
बूढानीलकण्ठस्थित मध्यवर्ती क्षेत्रमा निर्माण गरिएको ुहोटल फरेस्ट इनु बचाउन मापदण्डमा छेडखानी भएको छ ।
संखुवासभाबाट प्रत्यक्ष निर्वाचित कांग्रेस सांसद दीपक खड्काको लगानीमा वातावरणीय प्रभाव मूल्याङ्कन नै नगरी निर्माण गरिएको ४ तले होटल जोगाउन मध्यवर्ती क्षेत्र (उद्योग स्थापना र सञ्चालन) मापदण्ड– २०६२ परिमार्जन गरिएको हो ।
००००
प्रधानमन्त्री पुष्पकमल दाहाल ‘प्रचण्ड’ले वीर अस्पतालमा बिरामीले गुनासो गर्ने अवस्था नआउने गरी काम गर्न निर्देशन दिएका छन् । चिकित्सा विज्ञान राष्ट्रिय प्रतिस्ठानका पदाधिकारीको छलफलमा बिहीबार प्रधानमन्त्री ‘प्रचण्ड’ले वीर अस्पतालबाट जनताले प्राप्त गर्ने सेवाबाट देशको स्वास्थ्य चित्र देखिने भएकाले सेवा गुणस्तरीय र सुलभ हुनुपर्ने बताएका हुन् ।