विराटनगर महानगरपालिकाले बहाल करमा हेरफेर गरेको छ । आर्थिक ऐनको पहिलो संशोधनमार्फत् महानगरले घर धनीहरूलाई फाइदा पुग्नेगरी घर बहाल कर घटाएको हो ।

महानगरले आर्थिक ऐन संशोधन गर्दै  चल्तीको बजार क्षेत्रमै घर बहाल कर घटाएको छ । यसले महँगोमा बहाल लगाएर नक्कली सम्झौता बनाई न्यून कर तिर्दै आएका घरधनीहरूलाई थप फाइदा हुने भएको हो । एक महिनाअघि नगर सभालबाट पारित आर्थिक ऐन कार्यान्वयनमा आएको हो । 

महानगरले विराटनगरको ट्राफिक चोकदेखि जलजला चोक, मात्रिका चोकदेखि हस्पिटल चोक र कञ्चनबारी चोक क्षेत्रका व्यवसायिक भवनहरूको बहाल कर घटाउने निर्णय गरेको छ । विराटनगरको चल्तीको व्यापारिक क्षेत्र हो । 

नगर सभाबाट महानगरले वडा नम्बर ७ को मात्रिका चोकदेखि हस्पिटल चोकसम्म मूल सडक छुने व्यवसायिक भवनहरूसँग लिइँदै आएको बहाल करको दर घटाएको छ । महानगरले उक्त सडकमा पर्ने भवनहरूबाट प्रतिवर्गफिट १५० रुपैयाँका दरले बहालकर लिँदै आएकोमा त्यसलाई घटाएर ११० रुपैयाँ कायम गरेको छ । यसैगरी मात्रिका चोकदेखि हस्पिटल चोकसम्मको भित्री सडक दायाँबायाँका व्यवसायिक भवनका सटरसँग प्रतिवर्गफिट १५० रुपैयाँ बहाल करलाई घटाएर १०० रुपैयाँ बनाउने निर्णय गरेको छ । 

यस्तै विराटनगर महानगरपालिका ९ ट्राफिक चोकदेखि जलजला चोकसम्म मूल सडकले छोएका व्यवसायिक भवनहरूको बहाल कर प्रतिवर्गफिट १५० रुपैयाँ कायम रहेकोमा त्यसलाई घटाएर ११० रुपैयाँ बनाउने निर्णय गरिएको छ । यस्तै धरान रोडबाट पूर्व महावीर चोकसम्मका सटरहरूको बहाल कर १०० रुपैयाँबाट घटाएर ८० रुपैयाँ बनाउने निर्णय गरेको छ । 

विराटनगर–३ कञ्चनबारी चोकबाट पूर्व, उत्तर र दक्षिणतर्फ १०० मिटरभित्रका सटरहरूको बहाल कर पनि घटाइएको छ । यसअघि १०० रुपैयाँ प्रतिवर्गफिट बहाल कर लिँदै आएको महानगरले कर घटाएर ८० रुपैयाँ कायम गर्ने निर्णय गरेको हो । 

महानगरले विराटनगर–७ मा केही ठाउँका व्यवसायिक भवनहरूको बहाल कर निर्धारण गर्ने निर्णय पनि गरेको छ । धरान रोडदेखि महावीर रोड तथा हनुमान मन्दिर दक्षिण पश्चिमका सटरहरूको बहाल कर ९० रुपैयाँ बनाउने निर्णय पनि महानगरले गरेको छ । 

विराटनगर महानगरपालिकाले मिनी मार्टमा मदिरा बिक्री गर्ने व्यवसायिक फर्मको दर्ता तथा नवीकरण शुल्क बढाएको छ । मदिरा बिक्री गर्ने मिनी मार्टले तिर्दै आएको शुल्कमा थप दश हजार रुपैयाँ तिर्नुपर्ने व्यवस्था गरेको हो । 

शहीद रंगशालामा दिवाकालीन प्रयोग गर्दा १० हजार रुपैयाँ शुल्क लिने निर्णय गरेको छ । रात्रिकालमा रंगशाला प्रयोग गर्ने विषयमा भने महानगर मौन देखिएको छ । 

यस्तै महानगरले घर तथा विभिन्न संघ संस्थामा जनशक्तिलगायत अन्य सेवा उपलब्ध गराउने फर्म तथा व्यवसाय दर्ता तथा नवीकरण शुल्क ५ हजार रुपैयाँ लाग्ने व्यवस्था पनि थप गरेको छ ।

राजश्व नउठेपछि घर बहाल कर घटाइएको विराटनगर महानगरका अधिकृत सरोज गौतमले बताए । ‘विराटनगरमा १० प्रतिशतले पनि घर बहाल कर तिरेका छैनन्,’ उनले भने, ‘६० प्रतिशत व्यापारीले महानगरमा दर्ता पनि गरेका छैनन् ।