काठमाडौँ । प्रधानमन्त्री पुष्पकमल दाहाल प्रचण्डले परराष्ट्रमन्त्री एनपी साउदको फिनल्याण्ड भ्रमण रोकेका छन् । सत्ता गठबन्धनमा खटपट बढिरहेका बेला प्रधानमन्त्रीले परराष्ट्रमन्त्रीको निर्धारित भ्रमण अन्तिम समयमा रोकिदिएका हुन् । 

गतवर्ष तत्कालीन अर्थमन्त्री विमला राई पौड्यालको भ्रमण पनि प्रधानमन्त्रीले रोकिदिएका थिए । सुरुमा एमालेको साथ लिएर प्रचण्ड प्रधानमन्त्री बनेको भएपनि त्यतिबेला एमालेसँग खटपट भएर माओवादी कांग्रेससँग नजिकिएकै बेला विमलाको स्वीजरल्याण्डको भ्रमण प्रधानमन्त्रीले अन्तिम समयमा  रोकिदिएका थिए । 

लगत्तै फागुन १५ मा एमालेले सरकारलाई दिएको समर्थन फिर्ता लिँदै मन्त्रीलाई पनि फिर्ता बोलाएको थियो । त्यतिबेला विमलाको भ्रमण रोकेजस्तै प्रधानमन्त्रीले अहिले फेरि साउदको पनि भ्रमण रोकेको स्रोतले दाबी गरेको छ । 

तर, परराष्ट्र मन्त्रालयले चाहिँ विशेष परिस्थितिका कारण साउदको भ्रमण स्थगित भएको जिकिर गरेको छ । उनी ‘सेकेन्ड यूएन एलडीसी फ्युचर फोरम’ मा सहभागी हुन आजै फिनल्यान्ड जाने तय भएको थियो ।