विराटनगरमा हुने राष्ट्रिय टि २० च्याम्पियनसिपका लागि एनआईसी एशिया बैंक र मोरङ क्रिकेट एसोसिएसनबीच सम्झौता भएको छ ।

विराटनगरको बैजनाथपुर क्रिकेट मैदानमा मार्च ५ देखि मार्च १६ सम्म हुने च्याम्पियनसिप भव्य रुपमा आयोजनाका लागि उनीहरूबीच सहमति भएको हो ।

सहमतिपछि बैंकका ब्राण्डिङ एण्ड कर्पोरेट कम्युनिकेसन विभागका प्रमुख सरोज भट्टराईले खेल क्षेत्रमा क्रिकेटले महत्त्वपूर्ण योगदान पुर्‍याएको बताए । नेपाली जनमानसको मन-मनमा विशेष स्थान ओगटेको क्रिकेट खेलले समुदायलाई एकताबद्ध गर्ने अविश्मरणीय कार्य गरेको उनको भनाइ छ ।

एनआईसी एशिया बैंकले एकता, टिमवर्क र उत्कृष्टताको भावनालाई बढावा दिँदै आएको उनले बताए ।

एनआईसी एशिया बैंकले यस्ता प्रतियोगिताहरूमा सहकार्य गरेर खेल जीवनलाई प्रबर्द्धन गर्ने मात्र नभई राष्ट्रिय स्तरमा आफ्नो प्रतिभा प्रदर्शन गर्न इच्छुक युवा क्रिकेटरहरूलाई उत्कृष्ट मञ्च प्रदान गर्ने लक्ष्य राखेको उनले जानकारी दिए ।

यस्तै, मोरङ जिल्ला क्रिकेट एसोसिएसनका अध्यक्ष एमडी साद कुरेशीले क्रिकेट व्यवस्थापनमा एक महत्त्वपूर्ण कदमको प्रमुख चरणमा भुक्तानीहरूको डिजिटलाइजेसन गरिने बताए ।

एनआईसी एशिया बैंकको सहकार्यमा "प्लेयर अफ द म्याच'को रकम क्यूआर कोडबाट भुक्तानी गर्न सकिने व्यवस्था गरिएको उनले जानकारी दिए ।

'नेपाली क्रिकेटको वृहत् विकासमा योगदान गर्न गर्वित छौं । यसलाई राष्ट्रिय स्तरकै उच्चतम प्रतिष्ठित प्रतियोगितामा पुर्‍याउन प्रयास गरिरहनेछौं', उनले भने ।

​कार्यक्रममा बैंकका कोशी प्रदेशका हिराप्रसाद पौड्याल लगायत विभिन्न व्यक्तित्वहरूको समेत उपस्थिति थियो ।