ग्लोबल आईएमई बैंक लिमिटेडका थप ४१ वटा शाखा कार्यालयले एकसाथ वित्तीय साक्षरता कार्यक्रम सञ्चालन गरेका छन् ।

आफ्नो संस्थागत सामाजिक उत्तरदायित्वअन्तर्गत वित्तीय पहुँचबाट बाहिर रहेका विभिन्न लक्षित वर्गहरू पहिचान गरी उक्त कार्यक्रम गरिएको बैंकले जनाएको छ । 

कार्यक्रममा कृषक, लघु, साना तथा मझौला उद्यमी, मजदुर, वैदेशिक रोजगारमा जाने सम्भावित व्यक्ति, विद्यार्थी, महिला, विप्रेषण प्रापक तथा स्थानीय युवा–युवतीको सहभागिता रहेको थियो । 

मुलुकका विभिन्न जिल्लाका ४१ स्थानमा सञ्चालित कार्यक्रममा ५ हजारभन्दा बढी व्यक्तिलाई बचत, कर्जा, रेमिट्यान्स, डिजिटल बैंकिङ, बीमा, लगानी, अतिरिक्त बैंकिङ सेवा, वित्तीय ठगी र वित्तीय अनुशासनसम्बन्धी विषयवस्तुमा जानकारी गराइएको छ । 

बैंकले कोशी प्रदेशको झापास्थित दमक नगरपालिका र मोरङको विराटनगर महानगरपालिकामा आयोजना गरेका कार्यक्रममा २५० भन्दा बढी व्यक्तिको सहभागिता रहेको थियो ।  यस्तै मधेश प्रदेशअन्तर्गत सर्लाहीको मलंगवा नगरपालिकामा गरिएको कार्यक्रममा १०० भन्दा बढीको सहभागिता रहेको बैंकले जनाएको छ । 

बागमती प्रदेशअन्तर्गत काठमाडौं र ललितपुर महानगरपालिका, बूढानीलकण्ठ नगरपालिका, रामेछापको दोरम्बा शैलुङ गाउँपालिका, मन्थली नगरपालिका, धादिङको गल्छी गाउँपालिका, रसुवाको कालिका गाउँपालिका तथा गोसाइकुण्ड गाउँपालिकामा आयोजित कार्यक्रमहरूमा १ हजार २०० भन्दा बढी व्यक्तिको सहभागिता रहेको थियो । 

त्यसैगरी, गण्डकी प्रदेशअन्तर्गत स्याङ्जाको वालिङ्ग नगरपालिका, नवलपरासीको गैँडाकोट नगरपालिका, कावासोती नगरपालिका, विनयी–त्रिवेणी गाउँपालिका, लमजुङको बेशीशहर नगरपालिका, मध्यनेपाल नगरपालिका र तनहुँको भानु नगरपालिकाको कार्यक्रममा ९०० भन्दा बढी स्थानीयको सहभागिता रहेको थियो । 

यस्तै लुम्बिनी प्रदेशअन्तर्गत कपिलवस्तुको महराजगञ्ज नगरपालिका, बाणगङ्गा नगरपालिका, दाङको दंगीशरण गाउँपालिका, राप्ती गाउँपालिका, गुल्मीको मालिका गाउँपालिका, मुसीकोट नगरपालिका, चन्द्रकोट गाउँपालिका, नवलपरासीको रामग्राम नगरपालिका, पाल्पाको पूर्वखोला गाउँपालिका, रोल्पाको रोल्पा नगरपालिका, रुपन्देहीको देवदह नगरपालिका, बुटवल उपमहानगरपालिका, तिलोत्तमा नगरपालिका, रोहिणी गाउँपालिका, सिद्धार्थनगर नगरपालिका, अर्घाखाँचीको सन्धिखर्क नगरपालिकामा आयोजित कार्यक्रममा २ हजार ५०० भन्दा बढी व्यक्तिको सहभागिता रहेको थियो । 

साथै, सुदूरपश्चिम प्रदेशअन्तर्गत बैतडीको डिलासैनी गाउँपालिका र डडेल्धुराको अमरगढी नगरपालिकाको कार्यक्रममा २०० भन्दा बढी लक्षितवर्गको सहभागिता रहेको बैंकले बिहीवार जारी गरेको विज्ञप्तिमा उल्लेख छ ।

‘यससँगै बैंकले ७६ शाखा कार्यालयबाट ९ हजारभन्दा बढी लक्षित वर्गलाई विभिन्न सचेतनात्मक तथा वित्तीय सुरक्षासम्बन्धी जानकारी प्रदान गरी बैंकिङ कारोबार गर्न उत्प्रेरित गरेको छ,’ विज्ञप्तिमा उल्लेख छ, ‘यस आर्थिक वर्षमा बैंकले आफ्ना ३५० भन्दा बढी शाखामार्फत यस्ता लक्षित वर्गको सहभागितामूलक कार्यक्रम सञ्चालन गर्ने उद्देश्य राखेको छ ।’

ग्लोबल आईएमई बैंक मुलुकका ७७ वटै जिल्लामा शाखा सञ्जाल रहेको निजी क्षेत्रको पहिलो वाणिज्य बैंक हो । बैंकको ३५४ शाखा कार्यालय, ३७९ एटीएम, २७७ शाखा रहित बैंकिङ सेवा, ६५ एक्सटेन्सन र राजश्व संकलन काउन्टर तथा ३ वटा वैदेशिक प्रतिनिधि कार्यालयसमेत गरी १ हजार १०० भन्दा बढी सेवा केन्द्र रहेका छन् ।