उपप्रधान एवं गृहमन्त्री रवि लामिछानेले सुन तस्करी प्रकरणमा छानबिन आयोगले कारबाही सिफारिश गरेका पूर्व सभामुख एवं नेकपा माओवादी केन्द्रका उपाध्यक्ष कृष्णबहादुर महरामाथि तत्काल कारबाही थाल्न प्रहरीलाई निर्देशन दिएका छन् । 

प्रहरी महानिरीक्षक वसन्त कुँवर, प्रहरीको केन्द्रीय अनुसन्धान ब्यूरो (सीआईबी) प्रमुख श्यामलाल ज्ञवाली लगायतलाई आइतबार गृह मन्त्रालयमा निर्देशन दिँदै उनले कारबाही थाल्न निर्देशन दिएका हुन् ।

उच्च अदालतका न्यायाधीश डिल्लीराज आचार्य संयोजकत्वको आयोगले बिहीबार सरकारलाई प्रतिवेदन बुझाएको थियो । प्रतिवेदन प्राप्त गरेलगत्तै गृहमन्त्री लामिछानेले शुक्रवारदेखि प्रतिवेदन कार्यान्वयन शुरू गरेका थिए । 

आयोगले सुन तस्करीमा संलग्नलाई उन्मुक्ति दिने गरी अनुसन्धान गरेको भन्दै सीआईबीको नेतृत्व परिवर्तन गर्न सिफारिश गरेको थियो । लगत्तै सरकारले किरण बज्राचार्यलाई हटाएर श्याम ज्ञवालीलाई सीआईबी प्रमुखको जिम्मा दिएको थियो ।

गृहमन्त्रीको निर्देशनपछि सीआईबीले आयोगको प्रतिवेदन अध्ययन शुरू गरेको छ । 

आयोगको प्रतिवेदनले दोषी ठहर गरेको ‘ठूलो माछा’लाई कारबाही गर्न गृहमन्त्री लामिछानेले निर्देशन दिएका हुन् । 

विद्युतीय चुरोट भेपमार्फत भएको सुन तस्करीमा महराको प्रत्यक्ष संलग्नता रहेको प्रतिवेदनमा औंल्याइएको छ । 

तस्करीका लागि पूर्व सभामुखसमेत रहेका महराले डस्टर गाडी नै तस्करहरूलाई प्रयोग गर्न दिएको खुलेको छ ।

महराको कल डिटेल रिपोर्ट (सीडीआर)बाट तस्करहरूसँग परस्पर लिंक देखिएको, डिजिटल फरेन्सिक ल्याब परीक्षण (डीएफएल)बाट पनि केही प्रमाणहरू फेला परेको प्रतिवेदनमा उल्लेख छ ।

त्यसबाहेक उनले तस्करहरूलाई लजिस्टिक सपोर्ट गरेको पाइएको छ । दावासँग पैसा लिएर जीवन गुरुङको नाममा डस्टर गाडी दर्ता गरी महराले उपलब्ध गराएको स्रोतको दाबी छ ।

पढ्नुहोस्, यो पनि :
सुन तस्करसँग महराको कनेक्सन : लजिस्टिक सपोर्टदेखि डस्टर गाडी उपलब्ध गराउनेसम्म