चीनसँग क्षेत्रीय तनाब बढेको बेला संयुक्त राज्य अमेरिकाका विदेशमन्त्री एन्टोनी ब्लिङ्कन फिलिपिन्स पुगेका छन् । ब्लिङ्कनले फिलिपिन्सलाई थप सहयोगको आश्वासन दिएको बीबीसीले जनाएको छ । उनले फिलिपिन्सलाई बलियो सुरक्षा प्रदान गर्ने अमेरिकी वचन दोहोर्‍याएका छन् । फिलिपिन्स अमेरिकाको एउटा महत्त्वपूर्ण सहयोगी राष्ट्र हो ।

साउथ चाइना सागरमा चीन र फिलिपिन्सले गरेका दाबीका कारण केही महिनादेखि दुई देशबीच तनाब चुलिएको छ।

अमेरिकी विदेश मन्त्रालयका एक वरिष्ठ अधिकारीका अनुसार ब्लिङ्कनले फिलिपिन्सका अधिकारीहरूसँग व्यापार र वाणिज्यबारे पनि छलफल गर्ने छन् । ब्लिङ्कनको भ्रमणलाई फिलिपिन्सका राष्ट्रपति फर्डिनान्ड मार्कोस जूनिअरलाई अमेरिकी समर्थन बढेको रूपमा हेर्न सकिने ठानिएको छ ।

उक्त सागरमा सीमा, व्यापारिक मार्ग र समुद्री क्षेत्रबारे फिलिपिन्ससहित विभिन्न देशहरूको बेइजिङसँग लामो समदेखि विवाद चल्दै आएको छ ।