कांग्रेस पछि हटिसकेको छ, गृहमन्त्रीको नाम नराखी संसदीय समितिमा सहमति हुन्छ : मन्त्री गिरी

कानून न्याय तथा संसदीय मामिलामन्त्री पदम गिरीले सहकारी ठगीको छानबिन गर्ने संसदीय समितिको कार्यादेश र क्षेत्राधिकारमा आइतबारसम्म सहमति जुट्ने बताएका छन् ।

गृहजिल्ला पर्वत पुगेका मन्त्री गिरीले नेपाल पत्रकार महासङ्घले आयोजना गरेको पत्रकार सम्मेलनमा यस्तो बताएका हुन् । ​

कार्यादेशसहित समिति बन्नुपर्ने प्रमुख प्रतिपक्षी दलको अडानका कारण समिति गठनमा विलम्ब भएको बताउँदै उनले सत्तार र प्रतिपक्ष लचिलो भएर टुङ्गोमा पुग्नुपर्ने बताए ।

उनले आइतबारको संसद् बैठक अघि नै सहमति हुने र संसद्का कामकारबाही सञ्चालन हुने विश्वास व्यक्त गरे ।

बचतकर्ताको हिनामिना भएको रकम फिर्ता गर्ने प्रावधानसहित सहमति गर्नुपर्नेमा सत्तापक्ष सकारात्मक रहेको उनको भनाइ थियो ।

उपप्रधान तथा गृहमन्त्री रवि लामिछानेको नाम उल्लेख गर्नुपर्ने प्रतिपक्षी दल आफ्ना अडानबाट पछि हटिसकेको उनले बताए । अपचलन गर्ने कम्पनी वा सहकारीको नाम भने लेख्न सकिने उनको भनाइ थियो ।

उपप्रधान तथा गृहमन्त्री दोषी हो वा होइन भन्ने कुरा छानबिन पछि मात्र पुष्टि हुने भएकाले कुनै व्यक्तिको नाम तोकेर जाँदा गलत नजिर स्थापित हुने उनले बताए ।

मन्त्री गिरीका अनुसार आइतबार संसद्‌बाट नीति तथा कार्यक्रममाथिको छलफल टुङ्ग्याएर पारित गरिने र १५ गते बजेट ल्याउने तयारीमा सरकार जुटेको छ ।