राजीनामा झोलामा छ, काम गर्न नसके कांग्रेसलाई जस्तो गलहत्याउन पर्दैन– गृहमन्त्री लामिछाने

उपप्रधान तथा गृहमन्त्री रवि लामिछानेले नेपाली कांग्रेसलाई जस्तो गरेर राष्ट्रिय स्वतन्त्र पार्टी (रास्वपा)लाई गलहत्याएर सत्ताबाट बाहिर निकाल्नु नपर्ने बताएका छन् । 

शनिवार आयोजित पार्टीको एक कार्यक्रममा बोल्दै रास्वपाका सभापतिसमेत रहेका लामिछानेले काम गर्न नसकेको दिन रास्वपाका सबै मन्त्री राजीनामा दिएर निस्कने र त्यसका लागि राजीनामापत्र अहिल्यैदेखि झोलामा राखेर हिँडेको बताए । 

‘हामी देशको ठूलो राजनीतिक दल कांग्रेसलाई प्रधानमन्त्रीले गलत्याएर सरकारबाट फ्याँकेको जस्तो अवस्थामा पुग्दैनौं, काम गर्न सकेनौं भने हाम्रो राजीनामापत्र अहिलेदेखि झोलामा तयार छ । मात्रै मिति लेख्न बाँकी छ,’ उनले भने ।

उनले यही अवस्थामा काम गर्न पाए आउने चुनावअघि नै जनतामा भरोसा जोगाउन सकिने बताए । आफूहरू जोखिम मोलेर सरकारमा जोडिएको र टाँसिएर बस्न नचाहेको उनको भनाइ छ । 

‘सत्ता साझेदार दलका शीर्ष नेताहरूलाई भनेको छु– यही अवस्था कायम रहिरहे आउने चुनावअघि नै जनतामा भरोसा जगाउन सकिन्छ,’ उनले भने, ’हामी जोखिम मोलेर जोडिएका छौं । हामी टाँसिएर वा प्रधानमन्त्रीले निकाल्नुपर्ने अवस्थामा पुग्दैनौं भन्न हाम्रो स्पष्ट धारणा छ ।’

गृहमन्त्री लामिछानेले प्रधानमन्त्री पदको भागवण्डा कहीँकतै नगरिएको पनि सोही कार्यक्रममा स्पष्ट पारेका छन् ।